【日本旅遊攻略】Suica西瓜卡、ICOCA、PASMO加入Apple Pay教學！無需按金/轉地區！
去日本搭車買嘢，最方便緊係要有張「日本八達通」喺手。咁就唔使次次搭車都要去買飛、或者要袋住買嘢找嘅散紙。最多人用嘅「日本八達通」係俗稱「西瓜卡」嘅Suica，可以用嚟搭JR、地鐵、巴士等嘅交通工具同埋可以喺大部份嘅便利店、自動售賣機到買嘢。但官方宣佈由2023年6月8日起開始暫停發售部份Suica實體卡，好多人都表示好擔心去日本買唔到Suica嚟用。不過Suica、或者其他常見嘅交通卡好似ICOCA、PASMO都可以加入Apple Pay到繼續使用。加咗落Apple Pay可以隨時隨地增值之外，仲可以慳埋買實體卡嘅按金添！即刻睇下將Suica西瓜卡、ICOCA、PASMO加入Apple Pay嘅教學啦！
Suica西瓜卡、ICOCA、PASMO加入Apple Pay教學(按入向下彈)
- 第一部分：Suica西瓜卡、ICOCA、PASMO加入教學
- 第二部分：設定特快交通卡
- 第三部分：無法完成付款
Suica西瓜卡、ICOCA、PASMO加入教學
1.首先進入「銀包」/「Wallet」，再點選右上角嘅加號
2.然後揀選「交通卡」
3.進入「交通卡」後碌到最底，選擇你想要嘅日本交通卡
4.揀好交通卡之後選擇增值金額，每次需要增值最少¥1,000日圓
5.輸入金額後選擇付款方式
6.完成付款後就可以使用交通卡，Apple Pay內會顯示交易紀錄。如果係用嚟搭JR/地鐵嘅，仲會顯示埋你喺邊個站出閘同入閘添！
設定特快交通卡
如果想唔用Face ID/Touch ID就用到交通卡，就要將張卡設定做特快交通卡。
1.進入「設定」，再揀選「銀包與Apple Pay」
2.進入「銀包與Apple Pay」後揀選「特快交通卡」，再揀返啱啱開通嘅Suica卡就可以用得啦！
無法完成付款
如果係選擇付款方式嗰到卡住俾唔到錢，而你肯定自己張信用卡無問題嘅話，自己實測有兩大原因。
1.Suica西瓜卡因不明原因唔支援用Visa卡付款，所以想用Suica西瓜卡嘅就一定要用其他信用卡如Mastercard、JCB、銀聯及AE等信用卡。如果得Visa卡嘅朋友就建議用返ICOCA卡。
2.日本凌晨時間係做唔到增值、加卡嘅。用開日本網買嘢嘅朋友都知日本網喺日本凌晨時間係交易唔到嘅，所以如果凌晨先到日本嘅朋友建議喺香港加定卡、增定值先。
Suica西瓜卡、ICOCA、PASMO加入Apple Pay教學(按入向上彈)
- 第一部分：Suica西瓜卡、ICOCA、PASMO加入教學
- 第二部分：設定特快交通卡
- 第三部分：無法完成付款
去日本當然唔少得要唱錢同埋用外幣簽賬，但係點樣做先最抵呢？即係睇返里先生嘅攻略，等你去旅行之前都可以做好準備啦！
