龍運巴士接受電子支付 Mastercard、VISA、Apple Pay、Google Pay、雲閃付QR code全部都得！

大家終於可以用電子支付形式俾龍運巴士車費啦！啱啱龍運巴士推出咗新系統，由而家開始，大家就可以以電子形式俾車錢。當中Mastercard、VISA、Apple Pay、AlipayHK、雲閃付QR code等等嘅支付形式都接受，相信為大家都帶嚟一定嘅方便，起碼八達通負錢都仲可以用信用卡同電子形式俾錢先啦！但留意返暫時電子支付形式俾錢拎唔到「公共交通費用補貼」或長者及合資格殘疾人士$2乘車優惠。

當然大家用信用卡俾錢嘅就可以賺埋回贈啦，唔好以為咁少錢就冇用啊，呢啲從來都喺積少成多㗎，想知邊張信用卡啱自己嘅可以睇返現金回贈信用卡比較／里數回贈信用卡比較！

官網詳情：http://www.lwb.hk/tc/lwb-epayment.html

龍運巴士多元化電子支付教學

龍運多元化電子支付常見問題FAQs

龍運接受邊種電子支付形式？

• 基本上最普遍嘅電子支付形式龍運都接受，可以睇返以下列表。

感應式支付(Paywave)	Mastercard、銀聯、VISA
流動支付	Apple Pay、Google Pay(Android)、Samsung Pay
二維碼支付 (QR Code)	AlipayHK易乘碼 (EasyGo)、銀聯雲閃付App「乘車碼」*

*乘客需要將出行地區設定為香港

我可唔可以用電子支付形式幫埋其他人俾錢？

• 可以，但喺用同一張卡就要隔5分鐘先可以再俾錢，唔想等嘅就可以用返唔同信用卡或者電子錢包幫其他人俾錢。

用電子形式俾錢可唔可以享有車費轉乘優惠？

• 可以，但記住兩程車都要用返同一張信用卡或者同一個流動支付賬戶俾錢先可以享有優惠！

用電子支付形式俾錢可唔可以拎到「公共交通費用補貼」或長者及合資格殘疾人士$2乘車優惠？

• 唔得，因為政府的有關計劃仲未支援電子支付系統，如果想拎到以上優惠同補貼，就要用返八達通俾錢啦！