Mr. Miles同個Logo一樣，心口得個「里」字，唔係返工放工食飯訓覺就係睇里數酒店旅遊資訊，早早計劃出走，為的是離開香港休息下抖啖氣。里先生係會計師CPA及Corprate Finance出身，經常都要睇法律文件同各類嘅準則規則。對於銀行嘅信用卡條款及細則，里先生有啲怪辟鐘意慢慢去鑽研同理解，可以叫做職業病更加係變咗興趣，我相信當你中多兩次伏你都會去睇下)。
“我可以大大聲同佢講「我張機票里數換、免費嘅，酒店都係積分換」”
香港有個城中名人講過句經典：「願唔願意犧牲，睇少啲戲、去少啲日本？」如果有機會我會答返佢「學識點儲里數換機票，善用信用卡積分、免費去日本。」當然…公道講句邊個唔知平日洗少啲會儲多啲錢，大啲啲咁多機會買到香港嘅離地樓，去得旅行又點會完完全全免費，之但係學識儲里數換機票我起碼俾阿媽阿親戚朋友問「又去旅行，唔洗儲錢啊？」嘅時候我可以大大聲同佢講「我張機票里數換、免費嘅，酒店都係積分換。」。到你夠里數換到張Business機票俾從未坐過Business嘅屋企人可以開心同佢地去玩果時，佢會明白你，你都會知道計嚟計去咁辛苦儲返黎嘅里數都係值得嘅！既然錢都係要用，就要用得其所、用得啱方法、啱信用卡，互相平衡，去旅行都去得心安理得！
“Nobody cares more about your Miles than you do”
里先生好相信一句說話: Nobody cares more about your money than you do. 永遠都係，自己嘅錢自己管，無人會比你更上心你自己嘅錢。唔係孤寒、吝嗇，有經濟學理論解釋，叫代理理論(agency theory)。同樣道理Nobody cares more about your “Miles” than you do. 銀行廣告唔會話俾你知點選擇出「個人」最合適嘅信用卡或里數計劃，如果你「自己」唔去認識邊個飛行里數計劃適合你自己，或者用邊張信用卡儲里數最適合你自己嘅消費模式的話你只會離你嘅目標旅程越來越遠！
“希望可以建立到一個信得過又方便嘅平台俾同路人搵里數信用卡資料/睇優惠”
就係因為里先生唔係親眼睇到都唔信嘅性格，每有咩唔明唔confirm都要睇返官網條款驗証(又係職業病?好有可能係)。可惜當里先生想搵返信用卡條款/里數優惠條款/酒店優惠條款嘅時候都發覺搵得好辛苦又唔係咁易搵，所以希望MrMiles.hk包羅到各信用卡/優惠需注意嘅條款同埋source link，可以建立到一個信得過又方便嘅平台俾同路人(Hello里友!)搵里數信用卡資料/睇優惠，透過呢到+里先生Facebook Page同大家分享儲飛行里數心得攻略，分析各銀行信用卡魔鬼條款，提供信用卡及酒店優惠幫大家快D達成夢想，「里」遊世界！
P.S.: 呢篇關於里先生第一版本寫出嚟係2017年9月2日，做咗里先生8年，啱啱係2025年6月3日做咗少少Update，睇返自己當時寫既嘢其實都無咩要改，我對儲里數既諗法都係無變，而更加確信儲信用卡積分同里數係可以提升到大家既旅遊質素。
聯絡里先生:
- Facebook: www.facebook.com/MrMiles.hk/
- IG: www.instagram.com/mrmileshk/
- Threads: www.threads.net/@mrmileshk
- YouTube: 里先生 Mr Miles YouTube
- Twitter: 里先生 Mr Miles twitter
- Email: [email protected]
