2026大阪溫泉酒店推介｜里先生精選20間大阪溫泉酒店，由市區方便大浴場，到近郊／周邊豪華私人風呂/一泊兩食旅館都有！大阪市區有大浴場嘅酒店越開越多，就算入住市內酒店都有機會浸到天然溫泉！想體驗大阪溫泉酒店一泊兩食、甚至係有私人風呂，其實由大阪市區出發 1 個鐘內，就有好多隱世嘅溫泉旅館選擇！呢篇大阪溫泉酒店推介，就幫你精選咗20間高質酒店／旅館，分為大阪市區、大阪近郊、大阪周邊溫泉區三大類逐一介紹，仲會同你比較埋三大大阪周邊溫泉區點樣揀最好！
大阪溫泉酒店推介2026︱快速索引
精選大阪溫泉酒店
| 酒店名稱 | 分類 | 風呂特色 | 訂房網址比價優惠 |
| 御宿野乃旅館 – 難波 | 市區 | 天然溫泉、半露天 | Agoda / Trip.com /Expedia |
| 大阪逸之彩酒店日本橋 | 市區 | 大浴場、免費拉麵 | Agoda / Trip.com / Expedia |
| 大阪阪神酒店 | 市區 | 天然溫泉、直連車站 | Agoda / Trip.com / Expedia |
| 伏尾溫泉 不死王閣 | 近郊 | 有私人風呂、天然溫泉 | Agoda / Trip.com / Expedia |
| 有馬溫泉兵衛向陽閣 | 有馬溫泉 | 金湯/銀湯、主題浴場 | Agoda / Trip.com / Expedia |
| 湯樂 溫泉旅館 | 城崎溫泉 | 貸切風呂、七外湯 | Agoda / Trip.com / Expedia |
| 濱千鳥之湯 海舟 | 白濱溫泉 | 海景貸切風呂、房內露天風呂 | Agoda / Trip.com / Expedia |
大阪市區溫泉酒店 (大浴場／天然溫泉)
行程排到密密麻麻嘅朋友，又想返到酒店可以浸溫泉？推介8間市中心（難波、梅田、心齋橋）溫泉酒店，行完街食完飯，返酒店就可以即刻衝去大浴場鬆一鬆，性價比極高！
市區溫泉酒店：御宿野乃旅館 – 難波 (Onyado Nono Namba)
御宿野乃旅館 – 難波 (Onyado Nono Namba)全館鋪設塌塌米，一入酒店就要除鞋，儀式感十足！行5分鐘就到日本橋站、黑門市場，地點超靚。旅4內有大浴場，而且係「天然溫泉 黑湯」，仲有半露天風呂同桑拿。如果想體驗和風旅館、又唔想離開市區，呢間就非常適合。浸完溫泉仲有免費雪條、益力多，宵夜有埋免費拉麵！
- 🚊交通：地鐵日本橋站步行約5分鐘
- 💰每晚房價：約HK$900–$1,600
- 🛁風呂特色：天然溫泉「黑湯」、半露天風呂、桑拿
- 評分：Google 4.3分、Agoda 8.9分、Trip.com 9.5分
即睇御宿野乃(難波)優惠！→
Agoda / Trip.com / Expedia
市區溫泉酒店：御宿野乃淀屋橋天然溫泉酒店 (Onyado Nono Osaka Yodoyabashi)
御宿野乃淀屋橋天然溫泉酒店 (Onyado Nono Osaka Yodoyabashi)係 2022 年喺大阪開嘅最新分館！位於商業區淀屋橋，環境比較清靜。同難波店一樣，全館塌塌米，大浴場係天然溫泉，亦有桑拿同露天風呂。如果你唔鍾意難波咁嘈，想靜靜地休息，又想去梅田/中之島，呢間新酒店係高質之選。
- 🚊交通：地鐵淀屋橋站/北濱站步行約5分鐘
- 💰每晚房價：約HK$850–$1,500
- 🛁風呂特色：天然溫泉、露天風呂、桑拿
- 評分：Google 4.5分、Agoda 9.5分、Trip.com 9.1分
即睇御宿野乃淀屋橋天然溫泉酒店優惠！→
Agoda / Trip.com / Expedia
市區溫泉酒店：深層水溫泉大阪逸之彩酒店日本橋 (Osaka Hinode Hotel Nipponbashi)
深層水溫泉大阪逸之彩酒店日本橋 (Osaka Hinode Hotel Nipponbashi)近年超受香港人歡迎！地點方便，行去黑門市場、日本橋站都係幾分鐘。大浴場雖然唔係天然溫泉，但用咗「深層水」，乾淨企理。最大賣點係超多免費服務：免費宵夜拉麵、免費酒水 Happy Hour、免費單車租借… 真係超級抵住！
- 🚊交通：地鐵恵美須町站步行2分鐘、日本橋站10分鐘
- 💰每晚房價：約HK$650–$1,200
- 🛁風呂特色：深層水大浴場、桑拿
- 評分：Google 4.4分、Agoda 8.9分、Trip.com 9.2分
即睇深層水溫泉大阪逸之彩酒店日本橋優惠！→
Agoda / Trip.com / Expedia
市區溫泉酒店：天然温泉四季彩之湯超級酒店大阪本町站前 (Super Hotel Premier Osaka Hommachi)
天然温泉四季彩之湯超級酒店大阪本町站前 (Super Hotel Premier Osaka Hommachi)係連鎖商務酒店，地點位於本町站，去梅田定難波都係兩個站，超方便。酒店嘅天然溫泉 四季彩之湯，泉水真係由地底湧出，喺市區商務酒店嚟講係超奢侈！除咗有真溫泉浸，仲有 Free Flow Welcome Bar，夜晚有多款酒精/非酒精飲品任飲！加上出名嘅自選枕頭服務，保證你玩完一日有覺好瞓。
- 🚊交通：地鐵本町站 24 號出口即達
- 💰每晚房價：約HK$500–$900
- 🛁風呂特色：天然溫泉「四季彩之湯」、Welcome Bar 任飲
- 評分：Google 4.3分、Agoda 分、Trip.com 9.3分
即睇天然温泉四季彩之湯超級酒店大阪本町站前優惠！→
Agoda / Trip.com / Expedia
市區溫泉酒店：大阪阪神酒店 (Hotel Hanshin Osaka)
想住梅田區又想浸溫泉？大阪阪神酒店 (Hotel Hanshin Osaka)係少數嘅選擇！酒店直連 JR 福島站（大阪站下一個站），行去梅田 Sky Building 都係 10 分鐘。最重要係，全館客房嘅浴室水龍頭一開出嚟就係天然溫泉！雖然大浴場需額外付費，且唔算好大，但可以喺自己房入面浸天然溫泉，係酒店獨有嘅賣點。
- 🚊交通：JR 福島站出口即達
- 💰每晚房價：約HK$500–$1,000
- 🛁風呂特色：房內即享天然溫泉、另有付費 Spa 大浴場
- 評分：Google 4分、Agoda 8.5分、Trip.com 9分
即睇大阪阪神酒店優惠！→
Agoda / Trip.com / Expedia
市區溫泉酒店：大阪城市廣場酒店 (City Plaza Hotel Osaka)
大阪城市廣場酒店 (City Plaza Hotel Osaka)位於商業區本町，地點相對靜。最大賣點係頂樓 14 樓嘅 Spa「天空」，有天然溫泉露天風呂、桑拿、按摩池，規模好大，景觀開揚！住客可以免費使用溫泉，非常抵！如果你想避開遊客區，享受一個高質素嘅溫泉浴場，呢間就滿足晒啦！
- 🚊交通：地鐵堺筋本町站步行6分鐘
- 💰每晚房價：約HK$600–$1,100
- 🛁風呂特色：天然溫泉、頂樓露天風呂、桑拿
- 評分：Google 4分、Agoda 8.9分、Trip.com 9.1分
即睇大阪城市廣場酒店優惠！→
Agoda / Trip.com / Expedia
市區溫泉酒店：大阪大和屋本店旅館 (Yamatoya Honten Ryokan Osaka)
想喺心齋橋住「真．旅館」？咁就要可以考慮下大阪大和屋本店旅館 (Yamatoya Honten Ryokan Osaka)！地點超方便，行 3 分鐘到道頓堀。屬於傳統嘅日式旅館，有塌塌米房，亦都有提供一泊兩食（懷石料理）。大浴場雖然唔係溫泉，但好有日式澡堂 feel。適合想喺市中心體驗傳統旅館、又唔強求真溫泉嘅朋友。
- 🚊交通：地鐵日本橋站步行5分鐘、心齋橋10分鐘
- 💰每晚房價：約HK$1,000–$2,000 (齋房)
- 🛁風呂特色：日式大浴場 (非溫泉)
- 評分：Google 3.8分、Agoda 8.4分、Trip.com 9.2分
即睇大阪大和屋本店旅館優惠！→
Agoda / Trip.com / Expedia
市區溫泉酒店：ART 大阪灣酒店 (Art Hotel Osaka Bay Tower)
ART 大阪灣酒店 (Art Hotel Osaka Bay Tower)就直結空庭溫泉！空庭溫泉入面有天然溫泉、岩盤浴、仲有得著靚靚浴衣打卡，加上酒店房喺 30 樓以上，個大阪灣夜景靚到癲！雖然入空庭溫泉通常要另外買飛（部分住宿 Plan 包埋），但住喺樓上真係超方便，玩到幾夜都得。比起普通大浴場，呢度係成個「溫泉娛樂城」，有得食有得玩，特別適合情侶或者一家大細去放電！
- 🚊交通：JR/地鐵弁天町站直結 (去 USJ / 梅田都係 15 分鐘)
- 💰每晚房價：約HK$600–$1,300
- 🛁風呂特色：直結「空庭溫泉」(天然溫泉、岩盤浴、天空庭園)
- 評分：Google 4.2分、Agoda 分、Trip.com 9.2分
即睇 ART 大阪灣酒店優惠！→
Agoda / Trip.com / Expedia
大阪近郊溫泉旅館 (私人風呂/一泊兩食)
如果想享受寧靜舒適嘅悠閒時光，建議可以抽 1-2 日時間，到大阪近郊溫泉旅館！享受一泊兩食又或者book間私人風呂嘅房間，好好放鬆一下。以下呢3間推介，全部位於大阪府內，由難波/梅田出發1個鐘內到！
近郊溫泉旅館：伏尾溫泉 不死王閣 (Ryokan Fushioukaku)
伏尾溫泉 不死王閣 (Ryokan Fushioukaku)係「大阪溫泉私人風呂」嘅 No.1 選擇！位於大阪池田市，由梅田搭車 30 分鐘就到（酒店有免費 shuttle bus）。旅館被山林包圍，好有世外桃源 feel。一定要 book 佢嘅「附露天風呂客房」，喺自己房就可以 24 小時任浸天然溫泉。加上一泊兩食會席料理都好高質，想喺大阪歎到盡，非常推介呢間。
- 🚊交通：梅田搭阪急電車至池田站 (約20分鐘)，轉乘酒店免費接駁巴士 (約15分鐘)
- 💰每晚房價：約HK$2,000–$4,500 (一泊兩食)
- 🛁風呂特色：房內私人露天風呂、天然溫泉、大型露天大浴場
- 評分：Google 3.9分、Agoda 8.4分、Trip.com 9.0分
即睇伏尾溫泉 不死王閣優惠！→
Agoda / Trip.com / Expedia
近郊溫泉旅館：犬鳴山溫泉 不動口館 (Fudouguchikan)
犬鳴山溫泉 不動口館 (Fudouguchikan)位於關西機場附近嘅犬鳴山溫泉鄉。呢度係大阪府內唯一嘅溫泉區，環境超清幽。酒店最大賣點係佢個「溪流露天風呂」，真係望住條溪、聽住流水聲浸溫泉！佢雖然冇房內私人風呂，但有貸切風呂（私人湯屋）可以預約。好適合想體驗一泊兩食，或者想喺行程最後一日、去機場前歎一歎嘅朋友。
- 🚊交通：南海難波站搭車至泉佐野站 (約30分鐘)，轉巴士或的士
- 💰每晚房價：約HK$1,800–$3,500 (一泊兩食)
- 🛁風呂特色：天然溫泉、溪流露天風呂、貸切風呂 (私人湯屋)
- 評分：Google 4.2分、Agoda 8.7分、Trip.com 8.6分
即睇犬鳴山溫泉不動口館優惠！→
Agoda / Trip.com / Expedia
近郊溫泉旅館：大阪天見溫泉 南天苑 (Amami Onsen Nanten-en)
大阪天見溫泉 南天苑 (Amami Onsen Nanten-en)係一間傳統嘅數寄屋造建築，成本館被登錄為「國家有形文化財」。由難波搭南海高野線 40 分鐘直達天見站，行 1 分鐘就到。而且仲係米芝蓮推薦旅館，一泊兩食嘅懷石料理非常精緻。浸喺佢個天然鐳溫泉，望住個 3000 坪嘅日式庭園，完全係穿越時空。適合想遠離煩囂、體驗深度文化嘅旅客。
- 🚊交通：南海難波站搭車至天見站 (約40分鐘)，步行1分鐘
- 💰每晚房價：約HK$2,200–$4,000 (一泊兩食)
- 🛁風呂特色：天然鐳溫泉、日式庭園景觀、文化財旅館
- 評分：Google 4.3分、Agoda 9分、Trip.com 8.6分
即睇大阪天見溫泉南天苑優惠！→
Agoda / Trip.com / Expedia
大阪周邊溫泉區住宿 (有馬/城崎/白濱)
大阪府內比較少出名嘅傳統溫泉區，如果想體驗傳統溫泉旅館住宿，咁可以考慮有馬/城崎/白濱溫泉區，呢三個大阪周邊溫泉區 (有馬/城崎/白濱) 都係由大阪出發 1.5 – 3 個鐘車程。三地均有一泊兩食名旅館，由平價到奢華都有，一次過滿足泡湯+美食+日本風情！
- 有馬溫泉
有馬係全日本最古老嘅溫泉鄉之一，位於神戶，由梅田出發只需約 1 小時，交通最方便，就算唔入住酒店，即日來回都適合。最大特色係佢嘅「金湯」富含鐵質嘅紅褐色泉水同「銀湯」無色嘅碳酸泉。 - 城崎溫泉
城崎溫泉位於兵庫縣北部，由大阪出發約 2.5 小時。最出名就係「七外湯巡禮」，住喺度嘅旅客可以著住浴衣，拎住 free pass 浸勻七個公共溫泉，夜晚條街勁靚，好有氣氛。 - 白濱溫泉
白濱位於和歌山，有沙灘、有海中溫泉，度假感爆棚！特別適合家庭客，因為附近有 Adventure World（有熊貓），由大阪天王寺搭 JR 特急約 2 小時。
為咗方便大家比較，里先生為你整理咗三大溫泉鄉嘅特色：
| 溫泉區 | 主要特色 | 泉質分類 | 大阪交通 (約時長) |
| 有馬溫泉 | 歷史最悠久、鄰近神戶 | 金湯 (鐵泉) & 銀湯 (碳酸泉) | 高速巴士 (1小時) |
| 城崎溫泉 | 七外湯巡禮、浴衣散步 | 鹽化物泉、碳酸氫鹽泉 | JR 特急列車 (2.5小時) |
| 白濱溫泉 | 海景露天風呂、鄰近熊貓樂園 | 鹽化物泉、碳酸氫鹽泉 | JR 特急列車 (2小時) |
大阪周邊有馬溫泉：有馬溫泉兵衛向陽閣 (Arima Onsen Hyoe Koyokaku Kobe)
有馬溫泉兵衛向陽閣 (Arima Onsen Hyoe Koyokaku Kobe)係有馬規模最大、歷史最悠久嘅旅館之一。擁有三個不同風格嘅大浴場，包括和風、羅馬風。佢哋嘅「一泊兩食」餐飲服務非常出名，適合鍾意傳統日式旅館、對服務同大浴場規模有要求嘅朋友。另外，旅館亦有提供貸切風呂（私人湯屋）服務。
- 🚊交通：神戶電鐵有馬溫泉站步行 5 分鐘 / 酒店有免費接駁車
- 💰每晚房價：約HK$2,000起 (一泊兩食)
- 🛁風呂特色：三大主題大浴場、貸切風呂、金湯/銀湯
- 評分：Google 4.4分、Agoda 9.1分、Trip.com 9.4分
即睇兵衛向陽閣優惠！→
Agoda / Trip.com / Expedia
大阪周邊有馬溫泉：有馬格蘭酒店 (Arima Grand Hotel)
有馬格蘭酒店 (Arima Grand Hotel)走現代豪華路線，位於高處，擁有無敵嘅展望景觀，可以俯瞰有馬溫泉鄉同六甲山。佢嘅頂樓露天風呂係打卡熱點！房間設計新淨，設有附私人溫泉露台嘅客房，如果你想有極高嘅私隱度，呢種房型就最啱你！
- 🚊交通：神戶電鐵有馬溫泉站有免費接駁車
- 💰每晚房價：約HK$2,500起 (一泊兩食)
- 🛁風呂特色：展望大浴場、房內露天溫泉客房、金湯/銀湯
- 評分：Google 4.4分、Agoda 9.1分、Trip.com 9.6分
即睇有馬格蘭酒店優惠！→
Agoda / Trip.com / Expedia
大阪周邊有馬溫泉：月光園 鴻朧館 (Arima Onsen Gekkoen Korokan)
月光園 鴻朧館 (Arima Onsen Gekkoen Korokan)被譽為有馬溫泉入面最親近大自然嘅旅館，旅館沿河岸而建，大部分客房都可以望到靚絕嘅溪谷景色。餐點同服務都非常高質，懷石料理做得好精緻，係追求景觀同日式寧靜氛圍嘅首選。
- 🚊交通：神戶電鐵有馬溫泉站有免費接駁車
- 💰每晚房價：約HK$2,800起 (一泊兩食)
- 🛁風呂特色：天然金湯/銀湯、溪谷露天風呂
- 評分：Google 4.3分、Agoda 8.8分、Trip.com 9.3分
即睇月光園鴻朧館優惠！→
Agoda / Trip.com / Expedia
大阪周邊城崎溫泉：湯樂 溫泉旅館 (Yuraku Kinosaki Spa & Gardens)
湯樂 溫泉旅館 (Yuraku Kinosaki Spa & Gardens)以擁有日式庭園景觀聞名，而且佢嘅餐點（尤其係冬季嘅松葉蟹）非常出名，係追求一泊兩食要有高品質料理嘅首選。設有三個貸切風呂（私人湯屋）俾住客免費預約使用，而且仲有提供去七外湯嘅接送服務，可以享受內外兼修嘅溫泉體驗。
- 🚊交通：JR 城崎溫泉站步行 15 分鐘 / 酒店有免費接駁車
- 💰每晚房價：約HK$3,000起 (一泊兩食)
- 🛁風呂特色：三個免費貸切風呂、優美庭園、七外湯 Pass
- 評分：Google 4.3分、Agoda 9.3分、Trip.com 9.6分
即睇湯樂溫泉旅館優惠！→
Agoda / Trip.com / Expedia
大阪周邊城崎溫泉：西村屋 招月庭 (Kinosaki Onsen Nishimuraya Hotel Shogetsutei)
西村屋 招月庭 (Kinosaki Onsen Nishimuraya Hotel Shogetsutei)係城崎溫泉入面嘅頂級老舖，分成本館（純傳統）同招月庭（現代和風）。招月庭被森林環繞，提供極致嘅寧靜同奢華。呢間係有錢都未必 Book 到嘅超高級旅館，庭園溫泉更加係必浸。適合預算冇上限，追求頂級服務同米芝蓮級料理嘅朋友。
- 🚊交通：JR 城崎溫泉站有免費接駁車
- 💰每晚房價：約HK$4,500起 (一泊兩食)
- 🛁風呂特色：森林環繞露天風呂、七外湯 Pass
- 評分：Google 4.5分、Agoda 9分、Trip.com 9.4分
即睇西村屋招月庭優惠！→
Agoda / Trip.com / Expedia
大阪周邊城崎溫泉：銀花 – 城崎丸山川溫泉 (Kinosaki Maruyamagawa Onsen Ginka)
銀花 – 城崎丸山川溫泉 (Kinosaki Maruyamagawa Onsen Ginka)位於丸山川河畔，遠離主要嘅七外湯大街，私隱度極高，非常適合情侶或蜜月。酒店走精緻路線，餐點非常創新同有格調。大部分房間都有靚景，係追求寧靜、浪漫嘅旅客嘅最佳選擇。
- 🚊交通：JR 城崎溫泉站有免費接駁車
- 💰每晚房價：約HK$3,500起 (一泊兩食)
- 🛁風呂特色：河畔露天風呂、七外湯 Pass
- 評分：Google 4.6分、Agoda 9.2分、Trip.com 8.5分
即睇銀花 – 城崎丸山川溫泉優惠！→
Agoda / Trip.com / Expedia
大阪周邊白濱溫泉：濱千鳥之湯 海舟 (Hamachidorinoyu Kaisyu)
濱千鳥之湯 海舟 (Hamachidorinoyu Kaisyu)係白濱溫泉嘅頂級代表，走現代和風路線。最大賣點係擁有三個無敵海景嘅私人露天風呂 (貸切風呂)，免費俾住客使用！可以喺懸崖邊嘅露天風呂浸溫泉，望住太平洋，簡直係人生享受！另外，亦有豪華嘅一泊兩食住宿套餐可以揀。
- 🚊交通：JR 白濱站有免費接駁巴士
- 💰每晚房價：約HK$2,500起 (一泊兩食)
- 🛁風呂特色：三個免費海景貸切風呂、房內露天風呂客房、天然溫泉
- 評分：Google 4.1分、Agoda 9.2分、Trip.com 8.8分
即睇濱千鳥之湯海舟優惠！→
Agoda / Trip.com / Expedia
大阪周邊白濱溫泉：三樂莊酒店 (Hotel Sanrakuso)
三樂莊酒店 (Hotel Sanrakuso)位於白良濱沙灘前面，係一間傳統嘅大型日式酒店，擁有無敵嘅海景。行幾步就到沙灘，非常適合家庭旅客。酒店提供咗好多適合小朋友嘅活動同餐飲，而且房價比海舟平少少，係性價比較高嘅海邊住宿選擇。
- 🚊交通：JR 白濱站有免費接駁巴士
- 💰每晚房價：約HK$1,500起 (可選一泊兩食)
- 🛁風呂特色：海景大浴場、天然溫泉
- 評分：Google 4.2分、Agoda 8.6分、Trip.com 9.3分
即睇三樂莊酒店優惠！→
Agoda / Trip.com / Expedia
大阪周邊白濱溫泉：南紀白濱萬豪酒店 (Nanki Shirahama Marriott Hotel)
如果你鍾意國際品牌嘅管理同服務，南紀白濱萬豪酒店 (Nanki Shirahama Marriott Hotel)絕對係首選。酒店擁有無邊際嘅天然溫泉浴場，望住太平洋景觀。房間新淨、服務一流，早餐豐富。雖然唔係傳統旅館，但提供咗現代舒適嘅溫泉度假體驗。
- 🚊交通：JR 白濱站有免費接駁巴士
- 💰每晚房價：約HK$1,200起 (可選一泊兩食)
- 🛁風呂特色：頂樓露天風呂、無邊際海景溫泉
- 評分：Google 4.2分、Agoda 8.8分、Trip.com 9.2分
即睇南紀白濱萬豪酒店優惠！→
Agoda / Trip.com / Expedia
大阪酒店住宿合集2026
大阪溫泉酒店推介2026︱常見問題
邊幾間大阪溫泉酒店有私人風呂？
如果你想搵「房內私人風呂」（24小時任浸），首選一定係近郊嘅「伏尾溫泉 不死王閣」。 但如果你想喺市區搵「貸切風呂」（私人湯屋），好消息！ART 大阪灣酒店直結嘅「空庭溫泉」係有得 Book 私人湯屋嘅（需額外付費），特別適合情侶或者一家大細想有私隱度咁浸！
邊幾間大阪溫泉酒店有一泊兩食？
絕大部分嘅「一泊兩食」都係要喺「大阪近郊溫泉旅館」先有提供，例如：伏尾溫泉 不死王閣、犬鳴山溫泉 不動口館。
大阪天見溫泉 南天苑 市區嘅「大阪大和屋本店旅館」亦有提供一泊兩食方案，但大部分市區酒店（例如 Dormy Inn / Super Hotel）主要係包早餐，晚餐建議大家出去食盡大阪美食！
我有紋身，可唔可以浸大浴場？
日本大部分公眾大浴場都仍然謝絕紋身人士進入。不過里先生有兩個解決方案：
1. 揀「紋身友善」酒店： 「大阪逸之彩酒店」係少數明文規定「歡迎紋身人士」使用大浴場嘅酒店！
2. 租用「私人風呂」： 揀有房內溫泉嘅「不死王閣」或者租用「空庭溫泉」嘅私人湯屋，咁就無人理你，想點浸都得啦！
Check-out 嗰陣多咗項收費？咩係「入湯稅」？
唔好以為酒店收多你錢呀！根據日本法例，只要你住嘅酒店有提供「天然溫泉」，每位住客每晚就需要徵收約 150日圓 嘅「入湯稅」。 留意返，好似 Dormy Inn 難波、逸之彩呢啲「人工溫泉」就通常唔使收；但「御宿野乃」、「Super Hotel 本町」呢啲天然溫泉就要收。通常會喺你 Check-in 或 Check-out 時分開比。
