大家好，話咁快又嚟到2025年最後一日！有可能你係今年先認識里先生，又或者你係8年前已經開始支持我嘅讀者，多謝你哋2025年嚟睇我寫嘅野支持我。里某謹在此祝各位2026年事事順心，次次中特選，住親酒店升套房，分分有得賺，里數換親都有飛！
回望2025年，可以叫做銀行收水越見明顯年，係Marketing角度可以叫做啲Promo越做越『精準』，有跟開嘅朋友應該見到越來越多promo玩『特選優惠』，唔係人人有得玩。而2025年我覺得算係平淡啲，無當年HSBC推出Red Card & HSBC EveryMile卡或是AE Explorer面世時嘅震撼市場嘅新products。用里先生平台嘅數據，同大家去睇下2025年信用卡/里數界別大事回顧。睇下你有無Miss到邊樣或者邊啲條款改咗都唔知！
2025年信用卡/里數界別大事回顧
1月：國泰 Asia Miles 10% Bonus /MOX「4100」確立為全年優惠
2025年一開波就有好消息，國泰推出積分兌換Asia Miles 額外 10% Bonus優惠。當時我實測換咗14萬里數，除咗賺多10%里數之外，仲可以用10里數換到半島酒店雙人餐，真心抵玩。呢個優惠令大家都嗱嗱聲清空信用卡積分轉里數，為全年嘅旅行大計做好準備。
2024年尾公佈嘅Mox Credit「4100」玩法都係2025年確立咗為全年優惠。咩係「4100」？ 簡單嚟講係用Mox消費可以儲里數而「41」代表所有零售簽賬都有HK$4=1里，「0」「0」代表0上限及0%外幣兌換手續費。如果係pro玩家識折換里數及現金回贈的相對價值，你就知免1.95%外幣手續費其實好勁。
2月：AE Essential 藍卡面世，主打永久免年費
嚟到2月份，AE推出咗張全新嘅AE Essential 信用卡。實測申請好快到手，AE現有客仲係秒批卡。張卡嘅實卡似深藍色多過淺藍色，幾靚仔。呢張卡啲簽賬比率無AE Explorer咁強同埋AE Essentials換里數要手續費，但係最大賣點係「永久免年費」，再有人同你講AE啲卡要收年費可以一句KO佢。對於想玩AE白金卡積分「過冷河」嘅朋友嚟講，呢張卡出現得非常有戰略價值。
3月：滙豐罕有額外RC限時迎新/渣打國泰卡迎新送 Samsonite 喼
3月份平時好少做額外RC迎新嘅滙豐信用卡都係2025年3月27日開始做限時迎新！新客當時申請+滿足簽賬要求可以賺到額外$600RC、舊客都賺到額外$300RC！如果當時有申請嘅朋友應該今個月(12月)就會陸續收到額外RC。呢次限時迎新係連滙豐學生卡都有份！之後好耐都未見過滙豐做咁高嘅額外迎新優惠了。
而渣打國泰卡都開始推出新玩法Fanfest 迎新，新客迎新可以揀送 Cathay x Samsonite 20吋行李喼 或者高達 120,000 里數。呢個Samsonite喼個人覺得外表幾靚仔，仲入到UO當時嘅「行刑架」，可以帶埋上機。
4月：渣打國泰卡迎新送大阪機票
渣打國泰卡3月起開始玩Fanfest 迎新，可能行李喼未必個個啱心水，所以承接住3月嘅氣勢，渣打國泰喺4月放大招，新客當時申請+滿足簽賬要求就送國泰大阪來回機票（真機票唔係里數！），絕對可以稱得上係今年信用卡界別最震撼嘅 Offer 之一。要做機票嘅禮品Fulfillment係好唔簡單嘅任務，得渣打國泰呢張聯營卡有條件咁做。
5月：滙豐白金卡改版為HSBC Easy 信用卡
5月份開始經典嘅滙豐白金Visa卡正式改版為HSBC Easy 信用卡。卡面設計終於唔係獅子頭，變咗做比較年輕嘅設計。新卡加強咗同長和系(百佳、屈臣氏、豐澤)嘅合作，主要針對本地零售消費，賺取易賞錢。
6月：Asia Miles兌換優惠享30%回贈/中銀大灣區銀聯卡改版為中銀Go卡
踏入暑假前夕，國泰首次推出咗Asia Miles兌換優惠：兌換機票可享高達30% 里數回贈。最驚喜係連熱門航點日本同泰國都有份，我當時都忍唔住換咗套北海道機票，計埋回贈之後9,100里就換到單程北海道，真係慳返唔少。
另外中銀大灣區銀聯卡都係6月起改名爲中銀Go卡。改版後新增咗喺指定Go商戶簽賬有5%回贈、喺內地手機支付簽賬有10X積分(4%回贈)等優惠，強化咗呢張卡北上簽賬嘅用途同埋回贈。可惜嘅係改版後嘅中銀Go卡無咗舊有嘅手機簽賬4%回贈。
7月：PayMe 增值 0成本賺回贈正式完結
7月係一個時代嘅終結，滙豐信用卡增值 PayMe 0成本賺回贈嘅日子去到2025年7月正式完結。大家當時都趕住用HSBC EveryMile最後衝刺增值$3,000賺埋最後一水240里。雖然之後免手續費，但冇咗積分始終少咗個零成本賺分嘅途徑。不過用HSBC EveryMile增值 PayMe仍然可以計落HSBC EveryMile 免費入lounge後60日內要簽夠$4,000嘅簽賬要求，都算係好彩。
8月：AE 白金卡推出9x積分計劃
玩咗AE白金卡咁多年，8月份嘅改動真係顛覆咗我嘅認知。AE白金卡8月起推出咗「9x 積分」計劃。由以往只係用黎入 Lounge 嘅「Benefit Card」，搖身一變成為日常簽賬都可以儲分嘅「日常簽賬神卡」。 AE白金卡9X積分優惠嘅玩法同AE Explorer外幣優惠相似，一樣要先登記後簽賬。9X積分優惠主要分三大類別：AE外幣簽賬(包括實地及網上簽賬)、航空公司及旅遊簽賬(港幣)、日常指定商戶包括主要香港超市及油站(港幣)。
9月：HSBC Red卡新加指定商戶8%回贈！
網購神卡HSBC Red卡係9月更新咗條款，除咗網購繼續有4%回贈之外，再新增咗喺指定商戶簽賬有 8% 回贈！指定商戶包括壽司郎、譚仔、GU、迪卡儂等香港人經常幫襯嘅商戶，大大增加咗張卡嘅吸引力。係加回贈嘅同時，HSBC Red卡仲推出咗久違嘅迎新優惠，吸引咗唔少人都趁機申請。
10月：八達通接通 PayPay，遊日新體驗
10月最大新聞應該係八達通 App正式接通咗日本 PayPay。呢個功能令大家去日本旅行時，可以直接用八達通 App 開 QR Code 俾錢，仲要免外幣手續費。呢個消息係喺我FB同大家講嘅時候都有好好反應，證明大家對日本旅遊同免手續費係幾咁渴求！不過里先生本人就 當然會多數用外幣信用卡有5%或以上回贈：海外簽賬信用卡比較
11月：Apple Pay 八達通增值快閃優惠
11月有個好快閃但好抵嘅優惠，手動經 Apple Pay 增值八達通有額外 6% 回贈。雖然名額得 8,000 個要鬥快，但係增值八達通有咁高回贈真係好少見，唔少讀者見到個優惠就即刻衝咗。結果個優惠推出咗幾日就輕鬆打爆咗😂證明個優惠真係相當有吸引力。
12月：中銀Cheers卡Lounge Quota一目了然
嚟到年尾，中銀信用卡推出咗新功能，用戶可以喺BoC+ App睇到自己張中銀Cheers卡儲落嚟嘅中銀Cheers機場貴賓室免費使用次數餘額。以前儲落一大堆Quota唔知有幾多剩下，而家就可以一目了然清楚晒。計住quota就可以帶埋親戚朋友一齊入環亞 Lounge嘆魚蛋粉，或者去機場酒吧Intervals食個 Set啦。
2025年信用卡/里數界別大事回顧總結：展望 2026
2025年係面對經濟轉型嘅一年。展望 2026 年，我相信會有更多針對旅遊體驗同埋跨境消費嘅競爭。大家記住繼續留意里先生嘅報導，要慳又保持生活水平嘅，一定要跟貼我地嘅信用卡/里數優惠資訊，慳得幾多得幾多！
新一年再次祝願大家事事順心，2026年又有一個好開始 😃。
