Kiroro全攻略！近札幌都有！

北海道滑雪酒店2026最強攻略！嚴選19間二世古、留壽都、富良野、星野及Kiroro滑雪住宿。詳細分析北海道 Ski-in Ski-out 酒店、天然溫泉設施及真實住客評語。即睇里先生推介，話你知邊間房夠大啱親子、邊間可以幫你積累 Marriott / Hyatt / Hilton 會員積分。無論你係想追求極致奢華嘅滑雪，定係想搵間性價比高、有免費宵夜拉麵嘅溫泉酒店，呢篇北海道滑雪指南都會幫你揀到最適合你嘅粉雪天堂！滑完雪返到札幌，記得唔好錯過埋札幌酒店推介同札幌新酒店，有大品牌又有方便購物嘅好住宿！

北海道滑雪酒店 2026｜快速索引：

北海道 5 大熱門滑雪場特點比較
北海道滑雪酒店比較表
二世古 (Niseko) 粉雪朝聖地
留壽都 (Rusutsu) 親子與樹林滑雪
富良野 (Furano) 高 CP 值之選
星野 Tomamu 一站式度假勝地
札幌近郊：高質粉雪與隱世溫泉
北海道滑雪酒店常見問題

北海道滑雪區點樣揀？

滑雪地區	雪質	設施	消費水平	適合對象
二世古	5/5	5/5	高	追求極致粉雪、鍾意夜生活、預算充足
留壽都	5/5	3/5	中	鍾意穿林、家庭客、想住大型度假村
富良野	4/5	4/5	低	想體驗日本地道風味、追求高性價比
星野 Tomamu	3/5	5/5	高	一家大細、有唔滑雪嘅家人、追求打卡
Kiroro / 定山溪	5/5	2/5	低	避開人潮、短途滑雪、追求隱世溫泉

北海道滑雪酒店19間比較表

酒店名稱	地區	適合對象	Ski-in/out	天然溫泉	參考價錢	預訂平台
Park Hyatt Niseko Hanazono	二世古	頂級奢華/Hyatt粉	是	私人風呂	HK$6,500+	Agoda / Trip.com
Hilton Niseko Village	二世古	Hilton粉/性價比	是	露天浴場	HK$2,500+	Agoda / Trip.com
Skye Niseko	二世古	家庭客/高階公寓	是	有	HK$4,500+	Agoda / Trip.com
Ki Niseko (木二世古)	二世古	滑雪狂熱者	是	有	HK$3,000+	Agoda / Trip.com
Setsu Niseko (雪二世古)	二世古	吃貨/新晉奢華	需接駁車	有	HK$4,000+	Agoda / Trip.com
Niseko Northern Resort	二世古	新手家庭客	是	有	HK$1,800+	Agoda / Trip.com
Westin Rusutsu	留壽都	萬豪粉/大家庭	需火車接駁	有	HK$3,500+	Agoda / Trip.com
The Vale Rusutsu	留壽都	頂級公寓	是	直通壽之湯	HK$5,000+	Agoda / Trip.com
新富良野王子酒店	富良野	傳統觀光/滑雪客	是	紫彩之湯	HK$1,500+	Agoda / Trip.com
La Vista Furano Hills	富良野	Dormy愛好者	需巴士	有	HK$1,000+	Agoda / Trip.com
Fairfield Minamifurano	富良野	自駕遊/萬豪粉	否(自駕)	無大浴場	HK$800+	Agoda / Trip.com
NOZO HOTEL	富良野	文青/現代設計	行3分鐘	大浴場	HK$1,800+	Agoda / Trip.com
星野 Tomamu The Tower	Tomamu	家庭總動員	是	木林之湯	HK$1,500+	Agoda / Trip.com
星野 RISONARE Tomamu	Tomamu	奢華私隱/大房	需接駁車	按摩浴缸	HK$4,000+	Agoda / Trip.com
Club Med Tomamu	Tomamu	全包宴/唔想諗	是	有	HK$6,000+	Agoda / Trip.com
Club Med Kiroro Grand	Kiroro	新手/家庭全包	是	有	HK$6,500+	Agoda / Trip.com
Yu Kiroro (結喜樂樂)	Kiroro	高階少爺式滑雪	是	有	HK$4,500+	Agoda / Trip.com
定山溪悠樂草庵	定山溪	情侶/溫泉控	需巴士30分	私人風呂	HK$2,800+	Agoda / Trip.com
Grand Blissen 定山溪	定山溪	奢華設計/嘆世界	需巴士40分	景觀溫泉	HK$2,500+	Agoda / Trip.com

二世古區 (Niseko)：粉雪天堂與奢華住宿大亂鬥

呢度係北海道滑雪嘅「世界中心」，由四個滑雪場組成。如果你追求最好嘅「JAPOW」（日本粉雪），二世古係無敵。Hirafu 區夜晚極熱鬧，居酒屋同 Bar 滿街都係，但房價亦係全北海道最貴，記得預早半年搶房！

1. 二世古花園柏悅酒店 (Park Hyatt Niseko Hanazono)

二世古花園柏悅酒店絕對係二世古住宿嘅首推，亦係唔少滑雪客心目中最強嘅北海道滑雪酒店。2020 年開幕至今各方面依然維持得好好，如果你係跑開 Hyatt 凱悅會員嘅話，咁就唔使諗啦！一定係揀呢間！位於相對清靜嘅 Hanazono 區，粉雪質素仲要係全區數一數二。最正係提供 Ski Valet 服務，滑完返嚟，門口已經有專人幫你接過對板、除埋雪靴再幫你烘乾埋，超貼心。房內空間感極大，大部分房仲自帶私人風呂，滑完雪可以浸住熱湯睇雪。講到缺點，呢度消費真係幾赤，餐廳質素高但選擇唔多，加上位置偏離 Hirafu 鬧區，夜晚想食平嘢或者去便利店都要搭接駁車，適合預算充足、鍾意安靜歎世界嘅朋友。

❄️鄰近雪場：Hanazono (花園) 滑雪場
🚊交通：新千歲機場乘巴士約 2.5-3 小時直達；或乘 JR 到「俱知安站」轉酒店接駁車。
💰每晚房價：HK$6,500 – HK$15,000+
🍽️餐飲選擇：酒店內有多間高級餐廳（法餐、壽司、鐵板燒），但步行範圍內近乎零平民餐飲。
📢里先生短評：二世古奢華之最，Ski Valet 服務專業到令人變廢人。可惜位置太「隔涉」，房價同餐飲都幾拿脷，銀包唔夠深真係會睇到心驚驚。二世古 Park Hyatt Niseko 實測分享
⭐評價：Google 4.6/5、Agoda 9.1/10、Trip.com 4.7/5

✅ 優點	❎ 缺點
頂級奢華設計，房內私人風呂望雪景體驗一流 Ski Valet 服務極之流暢，係真正嘅 Ski-in Ski-out	房價係全區最貴之一，聖誕新年檔期極難預約遠離 Hirafu 中心區，生活機能同夜生活近乎零

即睇二世古花園柏悅酒店優惠！→
Agoda / Trip.com / Expedia

2. 二世古村希爾頓酒店 (Hilton Niseko Village)

二世古村希爾頓酒店係二世古嘅老牌五星級北海道滑雪酒店，Gondola 纜車站就喺正酒店門口，可以做到落樓即刻上山！滑完雪仲可以直落去浸露天溫泉，對正壯麗嘅羊蹄山，即刻紓解疲勞。身為國際大品牌，服務有保證，機場亦有直通巴士直達大堂，帶住一家大細或者超多滑雪裝備嘅旅客極度友善。跑開 Hilton會籍（Hilton Honors）嘅朋友，揀呢度仲可以累積積分或者享有會員專屬禮遇。不過，酒店始終有返咁上下歷史，房間裝修同設施難免有啲歲月痕跡。加上旺季實在太受歡迎，食早餐或者等𨋢隨時要排長龍。Niseko Village 區內嘅餐廳選擇相對少兼定價偏高，想食平民嘢就要搭車出去。

❄️鄰近雪場：Niseko Village 滑雪場
🚊交通：從新千歲機場乘直通巴士約 2.5-3 小時直達大堂。
💰每晚房價：HK$2,500 – HK$6,000+
🍽️餐飲選擇：酒店內有自助餐、鐵板燒及居酒屋，但 Village 區外圍餐廳定價偏貴。
📢里先生短評：纜車站喺正門口，羊蹄山靚景溫泉滿分！不過設施偏舊，旺季人多到食早餐都要排長龍，趕時間上山滑雪會幾頭痛。
⭐評價：Google 4.1/5、Agoda 8.3/10、Trip.com 4.2/5

✅ 優點	❎ 缺點
Gondola 站喺正門口，極速上山無難度絕美羊蹄山景露天溫泉，浸住雪景解疲勞	裝修設施明顯老化，欠缺現代奢華感旺季人山人海，等𨋢同食早餐極浪費時間

即睇二世古村希爾頓酒店優惠！→
Agoda / Trip.com / Expedia

3. 二世古Skye (Skye Niseko)

二世古Skye (Skye Niseko) 絕對係 Grand Hirafu 區嘅必住北海道滑雪住宿！霸佔咗成個 Hirafu 最高點嘅靚位，一出門口就係雪道。作為頂級公寓式度假村，房入面有齊靚裝廚房同洗衣機，啱晒一家大細。酒店入面仲有高質天然溫泉，絕對稱得上係頂尖嘅北海道溫泉滑雪酒店。最大嘅挑戰係佢起喺大斜路頂，來回行路真係會行到氣喘。唔少住客都表示Ski-in/out 體驗係幾完美，但夜晚喺十字街飲完酒要行嗰段大斜路返酒店，真係行到懷疑人生。

❄️鄰近雪場：Grand Hirafu 滑雪場
🚊交通：從新千歲機場乘巴士到 Hirafu Welcome Center，酒店有接送專車。
💰每晚房價：HK$4,500 – HK$12,000+
🍽️餐飲選擇：酒店內設有 Kumo Restaurant，行落 Hirafu 街大把居酒屋選擇。
📢里先生短評：Hirafu 區天花板，落樓即滑兼極近熱鬧食街。死穴係超級難 book 同埋價錢硬淨，加埋位處斜路頂，出入行路當做 Gym。
⭐評價：Google 4.7/5、Agoda 9.2/10、Trip.com 4.8/5

✅ 優點	❎ 缺點
位置無敵，處於 Hirafu 最高點真正 Ski-in Ski-out 套房附設頂級廚房及洗衣設備，適合家庭長住	房價極高，旺季經常一房難求位處大斜路頂，步行落山食飯再返酒店幾吃力

即睇二世古Skye優惠！→
Agoda / Trip.com / Expedia

4. 木二世古酒店 (Ki Niseko)

木二世古酒店 (Ki Niseko) 係 Grand Hirafu 區極受歡迎嘅精品北海道滑雪酒店，最大賣點就係一出門口行幾步就到高速 Gondola 纜車站，對於衝粉雪嘅滑雪發燒友嚟講，絕對係無可挑剔嘅 Ski-in Ski-out 體驗。酒店裡面設有私人風呂可以預約，算係高質嘅北海道溫泉滑雪住宿之一。不過留意返，標準房型空間真係幾的骰，有住客反映標準房細到連開個大喼都要借位，兩個人住都覺得幾逼。

❄️鄰近雪場：Grand Hirafu 滑雪場
🚊交通：從新千歲機場乘巴士到 Hirafu Welcome Center，酒店提供專車接送。
💰每晚房價：HK$3,000 – HK$8,000+
🍽️餐飲選擇：酒店內有 An Dining 餐廳；行去 Hirafu 十字街約 10 分鐘，選擇極多。
📢里先生短評：門口就係高速纜車，滑雪狂熱份子恩物！可惜標準房堅係細，兩個人同時開大喼有難度，天寒地凍行出去覓食都要少少勇氣。
⭐評價：Google 4.5/5、Agoda 9.0/10、Trip.com 4.6/5

✅ 優點	❎ 缺點
10 秒直達 Hirafu Gondola，極致 Ski-in 便利設有高質私人溫泉可以預約，私隱度極高	基本房型空間較侷促，裝備多會好難轉身離主要食街有一段斜路，步行出入體力消耗大

即睇木二世古酒店優惠！→
Agoda / Trip.com / Expedia

5. 雪二世古酒店 (Setsu Niseko)

雪二世古酒店 (Setsu Niseko) 係近年二世古最矚目嘅新晉奢華酒店，硬件同設計都好高級。酒店最大賣點係將成條高級食街搬咗入去，有 Afuri 拉麵、高級壽司等，足不出戶都可以食好西！滑完雪仲有超靚嘅露天大浴場，絕對係享受型北海道滑雪酒店首選。唯一唔好就係並非 Ski-in Ski-out，雖然有專屬接駁車去雪場，但每日要拎住裝備上落車都幾考耐性。

❄️鄰近雪場：Grand Hirafu 滑雪場 (需搭乘接駁車)
🚊交通：從新千歲機場乘巴士到 Hirafu Welcome Center，酒店提供接駁。
💰每晚房價：HK$4,000 – HK$10,000+
🍽️餐飲選擇：陣容豪華，有 Afuri 拉麵、蟹鮨加藤等名店進駐。
📢里先生短評：硬件新淨、餐飲屈機，歎世界一流！伏位係無得直衝雪道，依賴專車出入，每日搬裝備上落車會幾考驗滑雪客嘅體力。
⭐評價：Google 4.8/5、Agoda 9.3/10、Trip.com 4.8/5

✅ 優點	❎ 缺點
2023 全新落成，硬件裝修達頂級奢華級別內置多間名店餐廳同超靚溫泉，享受指數爆燈	非 Ski-in Ski-out，需依賴接駁車來回雪場房價進取，純滑雪發燒友可能會覺得位置唔夠直接

即睇雪二世古酒店優惠！→
Agoda / Trip.com / Expedia

6. 二世古北方安努普利度假村 (Niseko Northern Resort An’nupuri)

二世古北方安努普利度假村 (Niseko Northern Resort An’nupuri) 位於平靜嘅安努普利區，係一間極受新手同家庭客歡迎嘅老牌北海道溫泉滑雪酒店。最大優勢係一出門口就係又闊又平嘅初級雪道，名副其實嘅 Ski-in Ski-out。滑完雪仲可以浸天然露天溫泉，睇住雪景浸真係爽。不過，呢度嘅缺點就係遠離繁華嘅 Hirafu 區，夜晚只能夠困喺酒店食 Buffet，有網民都話門口雪道對新手極友善，但酒店 Buffet 食到第三晚真係會悶到發慌。

❄️鄰近雪場：Niseko Annupuri 國際滑雪場
🚊交通：新千歲機場乘直通巴士約 3 小時直達酒店大堂。
💰每晚房價：HK$1,800 – HK$4,500+
🍽️餐飲選擇：酒店內有自助餐及西餐，但步行範圍內無其他食肆。
📢里先生短評：門口雪道夠闊夠平，新手家庭客最愛，天然溫泉高質。敗筆係遠離食街，夜晚無街行無嘢買，預算有限或怕悶人士要考慮清楚。
⭐評價：Google 4.3/5、Agoda 8.6/10、Trip.com 4.4/5

✅ 優點	❎ 缺點
完美 Ski-in Ski-out，雪道寬闊平緩，對新手極度友善天然溫泉質素極高，雪中露天風呂極具氣氛	周邊近乎零餐廳商店，夜晚困喺酒店無夜生活裝修偏向老派觀光酒店風格，欠缺現代感

即睇二世古北方安努普利度假村優惠！→
Agoda / Trip.com / Expedia

留壽都區 (Rusutsu)：被兩大巨頭壟斷的遊樂園

留壽都嘅降雪量驚人，而且佢嘅「林間滑道」（Tree Run）係滑雪老手嘅最愛。成個區基本由兩間大酒店壟斷，好處係一站式配套極齊，甚至有室內旋轉木馬，壞處係除咗酒店，你基本上無其他街行。

7. 留壽都威斯汀度假酒店 (The Westin Rusutsu Resort)

留壽都威斯汀度假酒店 (The Westin Rusutsu Resort) 係留壽都區內最高級嘅北海道滑雪酒店，亦係萬豪會員跑保級嘅熱門之選。呢度最大賣點係全館都係複式套房 (Maisonette) 設計，樓底極高兼空間超大，一家大細或者成班朋友入住都唔會覺得逼，夜晚瞓喺招牌 Heavenly Bed 上面真係秒速入睡。酒店自帶溫泉，可以避開對面主樓嘅人潮，享受寧靜嘅北海道溫泉滑雪住宿體驗。不過，威斯汀比較隔涉，要過去主雪場或食肆街，必須搭酒店單軌小火車，著住雪靴等車都幾熱。

❄️鄰近雪場：留壽都滑雪場
🚊交通：新千歲機場乘直通巴士約 90 分鐘直達；或從札幌市區乘免費接駁巴士（需預約）。
💰每晚房價：HK$3,500 – HK$9,000+
🍽️餐飲選擇：酒店內有自助餐及日式料理，但選擇不及對面主樓多。
📢里先生短評：全館複式房夠闊落，一家大細必選！死穴係去主雪場要搭單軌小火車，下下等車過對面隨時搞到失晒耐性。
⭐評價：Google 4.3/5、Agoda 8.8/10、Trip.com 4.5/5

✅ 優點	❎ 缺點
全館複式套房，空間極大，適合家庭或大班朋友 Heavenly Bed 保證睡眠質素，自帶高質寧靜溫泉	去主雪場及主要買嘢食飯區必須等單軌列車，費時失事房價硬淨，自助餐質素普通，對唔住個價錢

即睇留壽都威斯汀度假酒店優惠！→
Agoda / Trip.com / Expedia

8. 留壽都山谷酒店 (The Vale Rusutsu)

留壽都山谷酒店 (The Vale Rusutsu) 係近年落成嘅頂級公寓式酒店，硬件絕對係留壽都數一數二新淨。完美 Ski-in Ski-out 係唔少人揀佢嘅原因，而且直接連通極受歡迎嘅「壽之湯」溫泉大浴場，享受程度滿分。房間有齊高質廚房同洗衫機，非常實用。不過，雖然房內有靚廚房，但留壽都周邊被 Resort 壟斷，根本買唔到靚食材返去煮，加上房價極貴，銀包要夠深先搞得掂。

❄️鄰近雪場：留壽都滑雪場
🚊交通：新千歲機場乘直通巴士約 90 分鐘直達。
💰每晚房價：HK$5,000 – HK$15,000+
🍽️餐飲選擇：房內有廚房但難買靚餸；需依賴隔離 Resort 設施食飯。
📢里先生短評：硬件超班，直通壽之湯溫泉兼有廚房。唯一伏位係價錢貴到令人心痛，加上周邊被壟斷，食嘢買餸選擇極少。
⭐評價：Google 4.5/5、Agoda 9.1/10、Trip.com 4.6/5

✅ 優點	❎ 缺點
新落成頂級公寓，煮食及洗衣設備齊全，空間極大完美連接雪道及「壽之湯」溫泉大浴場，極致便利	天價住宿，CP 值視乎財力；超市選擇極廢，有靚廚房都難發揮無自家餐廳，食飯要行去隔離 Resort 搵位

即睇留壽都山谷酒店優惠！→
Agoda / Trip.com / Expedia

富良野區 (Furano)：十勝岳絕景與高質溫泉

位於北海道中心位置，降雪雖然未必及二世古咁厚，但「晴天率」較高。富良野市中心保留咗好濃厚嘅日本生活感，食飯平一大截，係追求高性價比同地道日本味嘅首選。

9. 新富良野王子大飯店 (Shin Furano Prince Hotel)

新富良野王子大飯店係富良野區最經典嘅北海道滑雪酒店。優勢係極致便利，出門口就係纜車站，真正 Ski-in Ski-out！滑完雪可以浸高質「紫彩之湯」溫泉，夜晚行去旁邊「精靈露台」影相。不過老牌酒店房偏細，兩個人帶大喼真係幾逼。加上離市區遠，非自駕想出去食平民居酒屋，等巴士隨時等出火，唔想煩就只能硬食酒店較貴嘅餐廳。

❄️鄰近雪場：富良野滑雪場
🚊交通：新千歲機場乘巴士直達約 2.5 小時；或從「富良野站」轉的士約 10 分鐘。
💰每晚房價：HK$1,500 – HK$4,000+
🍽️餐飲選擇：酒店內餐廳價錢偏貴；去市區食飯需乘車出入。
📢里先生短評：贏在落樓即滑同精靈露台打卡，紫彩之湯夠高質。敗筆係標準房細到開喼都難，無車出市區等巴士會排到燥底。
⭐評價：Google 4.2/5、Agoda 8.4/10、Trip.com 4.3/5

✅ 優點	❎ 缺點
落樓即滑極致便利，真正 Ski-in Ski-out 「紫彩之湯」溫泉極高質，旁邊精靈露台打卡一流	標準房空間極細，兩人同時開喼有困難出市區交通班次疏落，夜晚基本被困酒店硬食貴餐

即睇新富良野王子大飯店優惠！→
Agoda / Trip.com / Expedia

10. 富良野拉維斯塔酒店 (La Vista Furano Hills)

富良野拉維斯塔酒店 (La Vista Furano Hills) 係 Dormy Inn 集團旗下嘅高質北海道溫泉滑雪住宿。勝在夠方便，座落喺富良野 JR 站旁，行出門口大把平民居酒屋同超市。頂樓天然溫泉望雪山景，浸完仲有免費雪條同宵夜拉麵。當然酒店就非 Ski-in Ski-out，去雪場要搭十幾分鐘巴士，但亦有人表示雖然唔係落樓即滑，但為咗嗰碗免費宵夜拉麵同埋富良野最強早餐，搭車去滑雪都心甘情願。

❄️鄰近雪場：富良野滑雪場 (需乘車約 15 分鐘)
🚊交通：JR「富良野站」步行 3 分鐘即達，交通極方便。
💰每晚房價：HK$1,000 – HK$2,800+
🍽️餐飲選擇：包高質自助早餐，步出酒店即達市中心大把地道美食。
📢里先生短評：天然溫泉加免費拉麵宵夜正到痺，搵食極方便。伏位係離雪場遠，日日夾車搭兼搬重Gear，幾消耗體力。
⭐評價：Google 4.5/5、Agoda 9.0/10、Trip.com 4.6/5

✅ 優點	❎ 缺點
頂樓露天溫泉景觀開揚，提供免費宵夜拉麵及雪糕近 JR 站及市區中心，生活機能同餐飲選擇富良野最強	非 Ski-in Ski-out，每日往返雪場需依賴巴士或的士滑雪裝備存放與搬運過程較轉折費時

即睇富良野拉維斯塔酒店優惠！→
Agoda / Trip.com / Expedia

11. 北海道南富良野萬楓酒店 (Fairfield by Marriott Hokkaido Minamifurano)

北海道南富良野萬楓酒店係主打公路旅行嘅高性價比住宿。相比起本文中其他名牌酒店，佢價錢親民、房間極度新淨，而且床褥跟足萬豪標準，瞓得非常舒服。對於追求品牌保證、想趁滑雪之旅積累萬豪積分嘅萬豪旅享家 (Marriott Bonvoy)嚟講，絕對係回本之選。酒店旁邊就係「道之驛」，買手信或者食個簡餐都好方便。當然距離上係唔太方便，往富良野主雪場要成大約 45 分鐘車程，反而可以考慮去 Sahoro 或者 Tomamu 雪場仲近啲。

❄️鄰近雪場：Sahoro/Tomamu 雪場 (約 30 分鐘)；富良野主雪場 (約 45 分鐘)
🚊交通：強烈建議自駕，大眾交通班次極疏。
💰每晚房價：HK$800 – HK$1,500+
🍽️餐飲選擇：酒店無餐飲，依賴旁邊道之驛食肆。
📢里先生短評：房新床舒服，自駕遊恩物。伏位係無大浴場，離富良野主雪場極遠，非自駕絕對中大伏。
⭐評價：Google 4.4/5、Agoda 8.5/10、Trip.com 4.5/5

✅ 優點	❎ 缺點
房價親民，萬豪系新淨標準，床鋪極度舒服適合多區滑雪嘅自駕客，性價比極高	完全無天然溫泉或大浴場，缺乏滑雪後放鬆設施地理位置偏遠，非自駕人士完全無法進出雪場

即睇南富良野萬楓酒店優惠！→
Agoda / Trip.com / Expedia

12. 富良野NOZO酒店 (NOZO HOTEL)

NOZO HOTEL 係富良野滑雪區新貴，走北歐木系文青風，質感滿分。位置極優勢，行 3 分鐘即到「北之峰纜車站」，酒店入面仲有完善 Ski Locker。雖然係無天然溫泉，但就有普通熱水大浴場，如果唔係要求太高，只係想浸下湯嘅朋友都ok，不過定價上都幾進取，性價比見仁見智。

❄️鄰近雪場：富良野滑雪場 (北之峰區)
🚊交通：從「富良野站」轉的士約 10 分鐘即達。
💰每晚房價：HK$1,800 – HK$4,000+
🍽️餐飲選擇：酒店西餐廳水準唔錯；行去市中心需搭車。
📢里先生短評：行3分鐘即到纜車，文青打卡一流。伏位係無天然溫泉，只得大浴場，滑完雪想浸湯解疲勞會爭啲。
⭐評價：Google 4.6/5、Agoda 9.1/10、Trip.com 4.5/5

✅ 優點	❎ 缺點
2023 全新開幕，設計極具層次感，裝修新穎極近北之峰纜車站，附設專屬且寬廣嘅滑雪設備儲存空間	欠缺天然溫泉，僅提供大浴場，對溫泉愛好者吸引力較低定價較富良野市區其他酒店貴，周邊餐飲選擇稍遜

即睇富良野NOZO酒店優惠！→
Agoda / Trip.com / Expedia

星野 Tomamu 區：全家總動員必去度假勝地

呢度唔單止係滑雪場，更似一個大型遊樂場。就算你嘅旅伴唔滑雪，都可以在微笑海灘、霧冰平台或者水之教堂玩足全日。對於帶住小朋友嘅家長嚟講，星野嘅兒童教學同托兒設施係最強嘅。

13. 星野度假村 Tomamu The Tower (Hoshino Resorts Tomamu The Tower)

星野度假村 Tomamu The Tower 絕對係北海道最地標性嘅北海道滑雪酒店。呢度簡直係為家庭客度身訂造嘅巨型遊樂園，完美 Ski-in Ski-out 之餘，仲有微笑海灘、愛絲冰城同木林之湯，無論大人細路都玩到唔捨得走。度假村入面仲有條「螢火蟲之街」，食嘢選擇極多。不過，塔樓房間空間明顯偏細兼有啲老態。要留意嘅係旺季人流極度恐怖，食早餐同搭接駁車隨時排到懷疑人生，極度考驗耐性。唔少人住過都話：「配套對細路嚟講係天堂，但旺季朝早等𨋢真係等到想發火，建議住低層行樓梯仲快。」

❄️鄰近雪場：Tomamu 滑雪場
🚊交通：從 JR「Tomamu 站」轉乘度假村免費接駁巴士直達。
💰每晚房價：HK$1,500 – HK$4,500+
🍽️餐飲選擇：度假村內超過 20 間餐廳，螢火蟲之街選擇最豐富。
📢里先生短評：地標建築加波浪泳池，一家大細玩到癲。但旺季周圍都係人，食飯等位排到燥底，房內設施見老態，CP值直線下降。
⭐評價：Google 4.2/5、Agoda 8.5/10、Trip.com 4.4/5

✅ 優點	❎ 缺點
配套無敵，水上樂園、冰城等設施玩足幾日唔厭螢火蟲之街餐廳多，設有專屬兒童滑雪學校	房間偏舊且空間侷促，旺季人潮極度擁擠度假村太大，去邊都要等接駁車，費時失事

即睇星野 Tomamu The Tower 優惠！→
Agoda / Trip.com / Expedia

14. 星野度假村 RISONARE Tomamu (Hoshino Resorts RISONARE Tomamu)

星野度假村 RISONARE Tomamu 係區內頂級奢華之選。全館只提供過千呎嘅超大套房，私隱度極高。最正係每間房都自帶望雪景嘅私人按摩浴缸同桑拿房，滑完雪返房自己浸，係神級嘅北海道溫泉滑雪住宿享受。不過，RISONARE 遠離度假村核心，去微笑海灘或食街都要等接駁巴士。著住厚衫成日等車，真係會消磨晒啲度假 mood。

❄️鄰近雪場：Tomamu 滑雪場
🚊交通：從 JR「Tomamu 站」轉乘度假村免費接駁巴士直達。
💰每晚房價：HK$4,000 – HK$12,000+
🍽️餐飲選擇：頂層有專屬高級餐廳；去平民食街需搭車。
📢里先生短評：全套房兼有超大私人 Jacuzzi，豪氣迫人。死穴係位置偏遠，出入高度依賴接駁巴士，旺季等車極度浪費時間。
⭐評價：Google 4.6/5、Agoda 9.1/10、Trip.com 4.7/5

✅ 優點	❎ 缺點
全套房空間極大，房內自帶按摩浴缸及桑拿，極致奢華私隱度高，避開 The Tower 嘅人潮壓力	地理位置隔涉，去主要娛樂設施同食肆都要搭車房價高昂，旺季一房難求，CP 值視乎預算

即睇星野 RISONARE Tomamu 優惠！→
Agoda / Trip.com / Expedia

15. Club Med Tomamu 北海道度假村 (Club Med Tomamu)

Club Med Tomamu 係怕煩人士嘅終極北海道滑雪住宿。全包宴 (All-inclusive) 畀一筆錢就包晒三餐、酒水、滑雪 Pass 同教練！仲有熱情 G.O. 幫手湊小朋友，大人可以真正放鬆。不過總價極驚人，銀包大出血。餐飲主打國際 Buffet，食幾日會覺得悶，完全欠缺日本行街食地道居酒屋嘅風味，所以都有住客話：「G.O. 帶氣氛同教學真係一流，但自助餐口味太國際化，完全少咗份去日本食地道嘢嘅 Feel。」

❄️鄰近雪場：Tomamu 滑雪場
🚊交通：從 JR「Tomamu 站」落車有 Club Med 專車接送。
💰每晚房價：HK$6,000 – HK$15,000+ (全包套票)
🍽️餐飲選擇：全包自助餐，任飲任食，但欠缺地道日式小店風味。
📢里先生短評：包食包滑包教練，零煩惱極致體驗！死穴係總價極貴，日日食 Buffet 食到悶，想體驗日本地道風味就無份。
⭐評價：Google 4.6/5、Agoda 8.8/10、Trip.com 4.5/5

✅ 優點	❎ 缺點
All-inclusive 省時省心，連專業滑雪教學都包埋 G.O. 團隊帶動氣氛，設有 Kids Club 幫手湊仔	總價極高，對於唔滑雪嘅家人嚟講性價比極低餐飲選擇單一，缺乏外出探索地道美食嘅樂趣

即睇 Club Med Tomamu 優惠！→
Agoda / Trip.com / Expedia

札幌近郊：高質粉雪與隱世溫泉

呢區最適合想「快閃」或者唔鍾意排隊嘅人。Kiroro 係出名嘅「粉雪工廠」，雪量多到驚人；而定山溪則係著名溫泉鄉，雖然去雪場要搭車，但滑完雪浸住頂級溫泉睇溪谷景，係另一種浪漫。

16. Club Med北海道Kiroro Grand度假村 (Club Med Kiroro Grand)

Club Med Kiroro Grand 係 2023 年尾全新落成，雪質被譽為北海道第一。全包宴制包食包飲包教練，仲有天然溫泉，絕對係高質北海道溫泉滑雪酒店。不過缺點亦好明顯，Kiroro 係出名嘅山旮旯，周邊完全無便利店或餐廳，與世隔絕。想夜晚行街買嘢？呢度保證悶到你發慌。

❄️鄰近雪場：Kiroro 滑雪場
🚊交通：機場或札幌乘 Resort Liner 巴士，車程約 2 小時。
💰每晚房價：HK$6,500 – HK$16,000+ (全包套票)
🍽️餐飲選擇：全包自助餐，雖然多樣化但欠缺外出彈性。
📢里先生短評：雪質靚絕北海道，全包宴新手學童都照顧到。敗筆係與世隔絕，除咗滑雪無嘢做，想出市區食地道嘢近乎無可能。
⭐評價：Google 4.7/5、Agoda 8.9/10、Trip.com 4.6/5

✅ 優點	❎ 缺點
Kiroro 降雪量驚人，粉雪質素北海道數一數二，雪季長全新設施，全包 Pass 同教練，設有高質天然溫泉	山區偏僻，晚上零活動零街行，完全無夜生活機場入去車程長，非滑雪人士會覺得極度沉悶

即睇 Club Med Kiroro Grand 優惠！→
Agoda / Trip.com / Expedia

17. 結喜樂樂酒店 (Yu Kiroro)

結喜樂樂酒店 (Yu Kiroro) 係 Kiroro 最頂級公寓式北海道滑雪酒店，可以由小樽或札幌前往。賣點係完美 Ski-in Ski-out 加專屬 Ski Valet，有人幫你拎板烘鞋。間房有齊廚房洗衫機，滑完去浸高質天然溫泉，享受無得彈。只可惜係 Kiroro 喺深山，零超市、零食街！你想煮飯？入山前記得喺小樽買定幾日餸，否則只能捱貴價酒店餐。

❄️鄰近雪場：Kiroro 滑雪場
🚊交通：從新千歲機場乘直通巴士約 2 小時。
💰每晚房價：HK$4,500 – HK$12,000+
🍽️餐飲選擇：酒店內高價餐廳選擇少，房內有廚房但周邊難買餸。
📢里先生短評：Ski-valet 專業貼心，套房空間大。死穴係房價高兼零生活機能，夜晚局住自己煮或者捱貴價酒店餐。
⭐評價：Google 4.5/5、Agoda 9.1/10、Trip.com 4.6/5

✅ 優點	❎ 缺點
真正 Ski-in Ski-out，雪具管家服務極盡奢華全套房廚房設施齊全，空間感係區內最強	完全無超市配套，必須提前補給食材，極之反智餐廳單價偏高且需提前預約，性價比唔算高

即睇結喜樂樂酒店優惠！→
Agoda / Trip.com / Expedia

18. 定山溪悠樂草庵 (Jozankei Yuraku Soan)

定山溪悠樂草庵係札幌近郊新晉北海道溫泉滑雪住宿，全館榻榻米加私人風呂，和式風情滿分。共立集團出名多免費嘢：雪糕、益力多同宵夜拉麵。但滑雪客要注意：呢度去滑雪場要搭 30 分鐘巴士。日頭抬裝備去等車，滑完再抬返嚟，少啲體力都搞唔掂。不過返到嚟就有溫泉可以浸，又有一泊二食唔擔心冇啖好食，不時仲會有滑雪+浸溫泉套票！

❄️鄰近雪場：札幌國際滑雪場 (需乘巴士約 30 分鐘)
🚊交通：從札幌站乘「河童 Liner」巴士直達。
💰每晚房價：HK$2,800 – HK$5,500+ (一泊二食)
🍽️餐飲選擇：包高質一泊二食；溫泉街夜晚極靜，餐廳選擇少。
📢里先生短評：房內有私人風呂，和式服務同免費宵夜拉麵滿分。伏位係去雪場要搭半個鐘巴士，日日搬 Gear 體力消耗大。
⭐評價：Google 4.4/5、Agoda 8.9/10、Trip.com 4.5/5

✅ 優點	❎ 缺點
房內私人風呂質素高，免費宵夜及服務貼心一泊二食料理精緻，滑雪後浸浴享受係一流	非 Ski-in Ski-out，日日抬裝備通勤係極大體力挑戰酒店欠缺大型滑雪裝備櫃，出入搬運略嫌不便

即睇定山溪悠樂草庵優惠！→
Agoda / Trip.com / Expedia

19. 札幌Grand Blissen酒店定山溪 (Grand Blissen Hotel Jozankei)

札幌Grand Blissen酒店定山溪 (Grand Blissen Hotel Jozankei) 係定山溪溫泉區內近年翻新重開嘅現代奢華北海道溫泉滑雪住宿。酒店大浴場有超闊大嘅落地玻璃對正定山溪嘅溪谷，冬天可以一邊浸住暖笠笠嘅天然溫泉，一邊睇住出面漫天飛雪同結冰嘅溪谷。房型方面，大部分客房都設有特大窗戶面向森林或溪谷；餐飲方面，一泊二食提供高質素嘅和洋折衷料理。對於滑雪愛好者嚟講，美中不足嘅地方一定係離最近嘅「札幌國際滑雪場」要成大約 40 分鐘巴士車程。上網睇大部分人都表示大浴場個溪谷雪景靚到唔識形容，係去雪場搭嗰 40 分鐘巴士車程真係幾消磨意志，每日抬住對雪靴上落車真係好攰。

❄️鄰近雪場：札幌國際滑雪場 (需乘巴士約 40 分鐘)
🚊交通：從札幌站乘「河童 Liner」巴士，或預約酒店由真駒內站開出嘅專車。
💰每晚房價：HK$2,500 – HK$5,000+ (一泊二食)
🍽️餐飲選擇：精緻和洋料理，烤牛肉評價極高。
📢里先生短評：現代裝修加大浴場雪景，打卡必去。可惜離雪場極遠，非自駕人士抬裝備搬餐死，只適合輕度滑雪客。
⭐評價：Google 4.5/5、Agoda 8.8/10、Trip.com 4.5/5

✅ 優點	❎ 缺點
酒店新淨有設計感，大浴場溪谷雪景視覺震撼一泊二食水準高，適合追求高品質住宿嘅旅客	非滑雪導向酒店，通勤時間太長，唔適合每日衝雪場拿著重型雪具出入巴士站非常不便