【2026日本退稅新制全攻略】先課稅後退稅流程、實施時間、新舊制對比一覽

🎯 食迎新 ‧ 留條款 ‧ 賺 FPS

經里先生申請，FPS直派現金回贈

日本退稅新制落實會喺 2026年11月1日 正式實施！到時就會由現時嘅「即場扣稅」變成「先課稅，後退稅」。簡單講，大家喺日本買嘢要俾咗 10% 消費稅先，然後透過 J-TaxRefund 系統登記，去到機場出境前 Scan 護照同收據，確定符合資格後退稅金額先會退返落你張信用卡、電子支付戶口或者退現金。新制最大好處係買藥妝同零食 唔使再入免稅密封袋，方便執行李，而且全面取消 50 萬日圓免稅上限，11月起可以買得爽啲！但之後就要預早到機場退稅啦。

日本退稅新制幾時實施？新舊制度對比

日本政府已經正式公佈，新制會喺 2026年11月1日 全面推行。里先生整咗個新舊制對比表，一睇就明：

比較項目	現行制度（2026年10月31日或之前）	全新制度（2026年11月1日起）
退稅時機與付款	結賬當下直接扣除 10% 消費稅（俾未稅價）	結賬先付全數含稅價，去到機場出境後先退錢
辦理退稅地點	鋪頭內嘅免稅櫃檯即場搞掂	出境時喺機場 KIOSK 自助機或海關櫃檯退稅
商品分類與門檻	分一般物品同消耗品，兩者通常分開計	取消分類，全部商品未稅滿 5,000 日圓就可以退稅
免稅密封袋規定	消耗品（如藥妝、食物）必須密封，出境前嚴禁拆封	全面取消密封袋規定，方便執行李
退稅金額上限	消耗品最多只可以退 50 萬日圓	取消上限
出境期限	消耗品 30 日內出境，一般物品 180 日內出境	劃一規定為購物後 90 日內必須攜帶出境

2026 日本退稅新制最新流程

認住退稅標誌： 同舊制一樣，去買嘢首要條件係搵貼有 Tax-Free 標誌嘅鋪頭。
結賬先付全額含稅價： 只要同一日喺同一間鋪頭買滿稅前 5,000 日圓，結賬時照俾含稅價，記得同店員講你要做 Tax Free。
即場登記退稅資料： 透過鋪頭提供或者收據上面印住嘅 J-TaxRefund QR Code（日本最新免稅系統），用手機 Scan 完登記你嘅護照資料並選擇你想收返退稅款項嘅方式（例如信用卡、支付寶、微信支付或者機場退現金）。
機場自助查驗： 離境之前，去到機場一定要搵 KIOSK 自助通關機 或者海關櫃檯掃描護照。海關人員有機會要求核對你買嘅貨品，所以切記要將退稅品放喺容易拎出嚟嘅地方，做呢個step前唔好寄艙！
成功收取退稅款項： 系統確認無誤並且你成功離境之後，退稅款項就會自動入落你指定嘅信用卡或者戶口度；如果揀現金就可以喺指定櫃檯攞錢。

日本退稅攻略及注意事項

1. 藥妝店及平價連鎖店

自從新制公佈要經第三方平台退稅，好多人都擔心要硬食1.5%手續費。不過日本必去嘅 DON DON DONKI 同埋多慶屋已經宣佈新制下喺店內辦理退稅（退落信用卡）會由店家自己吸收手續費，以「0 手續費」吸引大家消費！即係大家依然可以賺盡退稅。而且買完啲 Mask、護膚品或者衫，返到酒店可以收好執行李！

2. 大型百貨公司與精品專櫃

去百貨公司（例如大丸、高島屋、伊勢丹）買名牌或者專櫃化妝品，除咗都要去專屬嘅退稅櫃檯排隊搞，仲多數會收取約 1% 至 2% 嘅退稅手續費，即係你實際只會退返 8% 左右。里先生建議如果想食盡 10% 退稅，買 Hermès、LV、Chanel 呢類高價名牌最好去 品牌旗艦店 買，因為獨立店鋪通常唔會額外收手續費！

3. 大型電器舖

去日本買電器，好多時都會有「免稅 10% + 優惠券額外 5-7% 折扣」。喺新制之下，BicCamera 已經講明免收退稅手續費。大家記得結賬嗰陣依然要出示優惠券，鋪頭會先同你做咗嗰 5-7% 嘅折扣，然後你用折實後嘅含稅價俾錢。去到機場搞掂退稅程序，你先會攞得返嗰 10% 消費稅。所以買大件電器要準備好足夠嘅彈藥找數先呀！