香港人熱愛飛行，對好多讀者嚟講一年坐幾次飛機都係家常便飯。但與此同時，隨住環保意識抬頭，我哋都日益關注飛行嘅環境足跡。今日探討嘅題目比較認真，航空業正共同面對一個重大挑戰：點樣係連接世界嘅同時，令世界走向更加可持續嘅未來。
國泰航空最近推出咗「國泰航空可持續航空燃油(SAF)計劃」，即日起至2026年3月31日，國泰會員每貢獻HK$1，即可獲得1「亞洲萬里通」里數！
每曆年嘅里數獎賞上限為200,000。大家喺減少碳排放嘅同時，又有得賺取「亞洲萬里通」里數回贈！
你可能會問：「我付出嘅呢筆錢究竟買咗乜嘢？乜嘢係SAF？」SAF全稱Sustainable Aviation Fuel，中文係「可持續航空燃油」，SAF正正係航空業邁向可持續未來嘅關鍵！呢個方案被全球航空業視為出路。下面我哋會同大家一齊了解下SAF究竟係乜嘢，同埋佢點解喺航空業嘅減碳路徑上扮演住咁重要嘅角色。
什麼是 SAF？它從哪裡來？
簡單嚟講，「可持續航空燃油」(Sustainable Aviation Fuel, SAF)係一種由可再生資源製成嘅飛機燃油。佢嘅來源十分多樣化，譬如最廣為人知嘅原料「廢棄食油」(Used cooking oil)，此外仲包括城市固體廢物(即垃圾)、農業殘渣，甚至係利用可再生能源捕捉嘅二氧化碳以及氫氣，充份利用我哋日常生活中嘅廢棄物，唔再繼續依賴從地底開採嘅化石原料。目前由廢棄食油以及脂肪酸提煉而成嘅HEFA 係唯一實現商業規模嘅技術路徑。
為何它比傳統燃油環保？
要理解 SAF 如何減碳，我哋唔需要複雜嘅科學公式，只需要想像一個「碳循環」嘅過程：
- 傳統燃油：將地底深處沉睡數百萬年嘅碳挖掘出嚟，燃燒後釋放到大氣中，從而令到大氣中嘅二氧化碳不斷「淨增加」。
- SAF(可持續航空燃油)： 佢嘅原料(如植物或廢棄油)係原本嘅生命歷程中已經從大氣中吸收咗二氧化碳。當我哋將佢轉化為燃油並燃燒時，其實只係將呢啲碳「還」返俾大氣，而唔係挖掘新嘅碳。
因此，從收集原料、提煉到最終使用嘅整個過程計算，純淨嘅SAF與傳統飛機燃料相比，可減少約80%嘅碳排放！
數據說話：SAF 的實際成效
事實上國泰航空已經係實際營運中大量使用SAF。根據國泰公佈嘅數字，單喺2024年，國泰已經使用咗超過6,000噸 SAF，實現咗近20,000噸嘅溫室氣體減排。
20,000噸減排量係乜嘢概念？即係大約相當於59,580位經濟客艙乘客來回香港及首爾(仁川)所產生嘅碳排放量！
為何 SAF 如此重要？
SAF之所以被視為關鍵，在於佢解決咗航空業最迫切嘅難題：
- 可兼容現有飛機：SAF 最大嘅優勢係「Drop-in」特性，佢可以安全地與傳統飛機燃料混合，直接注入現有嘅飛機引擎使用，無需為飛機進行任何改裝。
- 中短期嘅最佳方案：大家寄望嘅氫能或電動飛機技術仍在開發中，預計喺2050年前都難以支援長途航線。因此，SAF係目前唯一適用於長途飛行嘅減碳方案。
國泰航空喺《2024年度可持續發展報告》中，就重申咗SAF係實現2050淨零目標嘅「最關鍵方法」。事實上，呢項工作已經進行中。報告指出，國泰喺2024年已經使用咗6,884噸 SAF。
現實的挑戰：成本與混合
實現2050年前達到淨零碳目標嘅同時，我哋都要了解下SAF目前面臨嘅挑戰。
首先係成本，目前SAF嘅價格係傳統飛機燃料嘅2至4倍。其次係規範，依據現行國際法規，SAF必須與傳統飛機燃料混合使用，混合上限為 50%。咁樣意味住一班使用50%混合比例SAF嘅航班，佢嘅生命週期減排效益實際上約為 40%(即 80%效益嘅一半)。
共同參與：推動 SAF 的規模化
要克服成本高昂以及產量有限嘅挑戰，單靠航空公司並唔足夠。呢個需要整個產業鏈、政府政策，乃至消費者嘅共同推動。
喺香港，作為「香港可持續航空燃油聯盟」嘅聯合發起人，國泰航空正積極推動本地SAF生態系統嘅發展。而對於身為旅客嘅我哋，國泰航空亦都推出咗一個自願參與嘅平台，俾旅客能夠直接參與「國泰航空可持續航空燃油(SAF)計劃」。呢個計劃允許客戶估算佢特定航班嘅碳排放量，並購買相應的SAF，你嘅參與將幫助擴大SAF嘅採購及應用。
國泰航空同時為呢項計劃提供咗一項回贈方案，以鼓勵國泰會員參與：
- 優惠期：即日起至2026年3月31日
- 係呢個計劃入面，會員每貢獻HK$1，即可獲得1「亞洲萬里通」里數。
- 每曆年嘅里數獎賞上限為200,000。
- 所賺取嘅里數將於交易完成後8星期內存入會員賬戶。
- 計劃網址：https://bit.ly/4pxfzhT
航空業嘅目標係：透過航空公司與客戶嘅共同貢獻，加速擴大SAF喺飛行網絡中嘅整體使用規模，從而幫助應對飛行帶嚟嘅環境影響。
（如欲了解更多國泰航空的可持續發展策略，可參閱其《2024年度可持續發展報告》：https://www.cathaypacific.com/cx/zh_HK/about-us/sustainability/sustainability-reports.html）
