【美金定期風險?】息差3%做美元定期好唔好? 看3大因素比較美元定期 vs 港元定期 USD存款高2-3%應該轉美金

【投資101 ：港元存款 vs 美元存款】大家做啲存款類投資（包括活期存款/定期存款/貨幣基金etc.）果陣有無成日去諗到抵應該做港元或是美元好？會唔會擔心個貨幣兌換會好蝕？最近港元水浸搞到啲港元定期息跌咗好多，好多讀者就嚟問港元轉美元定期風險(或美元貨幣基金)，轉做美金定期好唔好。今次就快速同大家了解一下美元定期風險。其實識得計但中條數，知道晒成本及風險係邊就可以幫到你安全地賺多啲息差回報。

美金定期風險睇3大重點(以港元定期作為另一選擇)

作為香港人，到最後都係洗港幣嚟生活既角度，用港元兌換做美金可以留意以下成本/風險：

匯率風險，7.75-7.85之間最大差幅1.3%
銀行Spread 匯差單次0.3%，來回0.6%
息差，港元約1% p.a. 美元4% p.a.

1. 匯率風險，7.75-7.85之間最大差幅1.3%

基礎經濟學：香港行聯繫匯率制度，簡單嚟講令HKD/USD只會係7.75-7.85既區間浮動，金管局提供兌換保證。Source

假設你咁唔好彩揀咗差7.85入場買美金，到7.75時再賣返出去，匯率風險最大既損失就係(7.75-7.85)/7.85=-1.27%

2. 銀行兌換手續費 Spread

買外匯時我諗大家都知有買賣差價，銀行一般每次兌換會賺你0.3%，由港元轉美金計一次，美金返去港元又一次，來回滙差可以當作-0.6%

以下表格係我實測過富途牛牛兌換為美金時即時所需要的手續費，剛剛好就係0.3%，同一般銀行相約。你可以自己用個銀行App試下撳，個結果其實差不多。

3. 息差：港元約1% p.a. 美元4% p.a. 美金定期賺多3% p.a.

港元水浸搞到啲港元定期息跌咗好多，現在市場上好多港元定期都係得返1厘息，但係美元就有成4% (就算美元定期無，貨幣基金Money Market Fund MMF都容易搵到，例如富途牛牛現金寶MMF)，但係留意個風險位係個息都會浮動的，你今個月個息差有3%但做完個3個月定期後無人保證到到時都有咁大息差。

小結：匯率風險+兌換手續費 < 息差：值得轉做美元定存

我當1同2都用最差時機做，啫係輸1.9% (1.3%+0.6%)，同現時息差3%比較的話，1.9%要用8個月嚟recover返 (1.9%/3% = 0.63 x 12 = 7.6個月)，簡單嚟講係最差的情況只要美金放到8個月以上的話用美元做定期存款都必定比港元定期有so。如果你啲錢本身唔急用可以keep住做美金的話，現時轉做美元定存會更好。

實例：美元貨幣基金

啱啱我有啲先前做落嘅高息定期都到咗期係到搵緊做咩投資好，我個人都傾向係做啲低風險穩定就好，因為好多港元定期得返4%左右，啱啱走去研究下啲低風險貨幣基金，去咗富途牛牛到睇，佢係證券行而唔係銀行嚟，無得做定期存款但可以做同樣低風險的貨幣基金，有2隻幣揀：

比較港元回報美元回報

港元7日年化率4.63% (圖左)
美元7日年化率5.25% (圖右)

美元年化率高出0.62%，大家可以先記住呢個數

貨幣基金 vs 定期存款

因為最近啲定期存款利率跌咗好多，第一步我攞呢個7日年化率去同市面上的定期去比較，貨幣基金高啲，咁就試下去做

港元美元兌換率

下一個問題就係我應該做美元還是港元，首要考慮係個exchange currency手續費，啱啱試咗：

用港元買入美元7.8354
用美元買入港元7.8121

假設即時轉換計出嚟啫係個spread會輸0.3%，算式:（7.83-7.81）/7.83

計到去呢到唔知你明唔明白，輸0.3%可以理解作如果我選擇美元貨幣基金的話，年利率係高0.62%但就呢個轉換嚟講筆錢我需要放半年先至recover得返呢0.3%。或者可以睇下表會數字化咗可能易明啲

可理解作，轉換HK$78,000為美金就即時會輸咗HK$232，而美元定期的利息比港元定期的一年利息計落會高出HK$464，係匯率不變情況下，需要半年時間就賺得返個手續費。

港元存款 vs 美元存款簡化出來的結論

假設匯率不變情況下，就以上息差0.6%而貨幣轉換手續費0.3%，如果你筆錢打算做半年或以上的，應該揀美元貨幣基金。而我今次呢筆錢無打算係半年內轉返做港元而係保留美元用作收高啲嘅息，所以我轉咗做美元嚟做貨幣基金。

以上嘅解釋可能好低B，計咁耐先有結論，希望大家睇得明，你係銀行到去決定做港元定期還是美元定期時都可以用返同樣的logic去考慮：短錢的話做港元，長錢的話美元因為普遍息率更高又放得夠長而有著數。

如果你都打算去富途到做貨幣基金的話，今期里先生有新開戶額外優惠：富途牛牛開戶優惠

擔心匯差? 聯繫匯率制度

基礎經濟學：聯繫匯率制度運作，金管局提供兌換保證，承諾在7.75港元兌1美元的強方兌換保證水平，按銀行要求賣出港元，並在7.85港元兌1美元的弱方兌換保證水平，按銀行要求買入港元。Source: https://www.hkma.gov.hk/chi/key-functions/money/linked-exchange-rate-system/how-does-the-lers-work/