ANA The Room體驗大公開！︱最接近頭等配置！空間闊＋精緻飛機餐！入埋Lounge嘆即制壽司！

23 June 2023 MrMiless ANA 全日空里數, 機場貴賓室 Airport Lounge, 里數換機票情報

ANA The Room體驗大公開！︱最接近頭等配置！空間闊＋精緻飛機餐！入埋Lounge嘆即制壽司！

先前ANA宣佈咗多班6月份往來香港-東京羽田航班會改用新機型B777-300，Business Class有The Room配置嘅飛機。有幸用ANA里數35,000里（淡季）就坐到到2段去程HKG-HND及回程HND-HKD有The Room嘅航班。

本身B777 The Room機型多數只用係美國或英國航班（連歐洲航點CDG/ FRA都無），有機會香港出發都坐到真是好困難，而ANA香港官方專頁都大大宣揚呢件喜訊。可惜係暫時都只限6月，希望之後會再開吧。

兌換方法

講航空體驗前都講返聲，ANA嘅國際航班真係好難換，我幾年前儲落嘅ANA里數到現時都係第一次有機會兌換到。香港開關後嘅機位基本上Econ/ Business/ PEY全部都被掃晒，見多啲位嘅日子都係1年後又或者last minutes先有機會換到。而香港儲ANA里數最大來源係AE白金卡分再換去Marriott Bonvoy再轉為ANA里數，仲有大新ANA卡但得$8/里。香港要玩ANA都係難，儲又難換又難，想遠離國泰的話比較易係換同為Star Alliance嘅Singapore Airlines，起碼HSBC EveryMile同AE/DBS都換到。

時間

6月份ANA The Room機時間麻麻。去程係下午機我幾鐘意但回程日本返要8:30am機都幾慘，晨咁早5點起身就趕去機場

座位

ANA business class The Room個座位的確好寬敞，最signature 係有道門感覺會有私人空間，Business Class有咁嘅硬件都無咩好批評，The Room被譽為最接近頭等嘅配置都不為過。如果你仲有印象幾年前分享過Qatar Qsuite 都有相同嘅配置，而Qsuite更利害嘅係可相連2座變雙人床。要比較的話Qsuite絕對唔輸蝕。

The Room有個被批評點就係某啲座位要坐倒頭機，但我個人親身測試，去程時就特登揀咗倒頭位嚟坐試一試，飛行感覺完全無分別，要講有不同感覺都只係起飛/降落時個人本身向前傾就變咗向後傾咁，成個experience分別不大，有機會坐到倒頭位的話都唔洗太擔心。

仲想一提個位闊度係好夠，但長度嚟講我身高17x，平躺時感覺隻腳都易頂到，要打斜個人攞最大角度先訓得舒服啲。

食物

搭ANA相信食物係大家好睇重的人一環，坐過Econ嘅朋友好多都大讚。而我去程回程都係事先已揀咗日式，去程食果個豬肉飯同前菜都美味，擺盤都相當之靚，國泰是望塵莫及的。

回程係日本出發老實說我是有點失望，當日餐單係蕃茄牛肉壽喜燒飯，飯同樣用日本米好食但個牛肉用咗牛腩咁嘅肉而唔係本身認識嘅靚靚薄薄嘅牛咁，口感味道賣相都強差人意（見文內相片）。本身以為日本出發個餐食好穩陣但結果唔係

可能我期望過高，不過都講句口味好個人，如有得罪ANA fans的話請多多包涵。

短線The Room係無得好似長途咁去叫個拉麵咁但食完飯可繼續嘆酒，空姐仲會派多包零食過你咁。

服務

呢個放最後講因為我經常覺得無咁重要，又或者要求搭飛機要求有「服務」好似有點兒吹毛求疵，短途飛機我個人會視作交通工具的比率較高，而要求到感受到「服務」我覺得係一種奢侈嚟。又咁講如果你覺得有笑容，問個安，派下水serve吓茶，或撳鐘仔好快有空姐迅速回應就係好服務咁ANA Business Class係做到的，感覺人手都係充足除咗會快速應鐘，上機未起飛仲會同我吹2句問個安咁。又睇返國泰今時今日人手唔夠情況下，以上2點有好多時都未必做得夠。都係果句，要服務就留返去酒店玩吧。

短途ANA The Room就分享住咁多先。