【香港Staycation 基本禮儀 Dos & Don’ts】去香港酒店住返晚有咩要留意?做好自己就確保你玩得開心又安心!

【香港Staycation 基本禮儀 Dos & Don’ts】去香港酒店住返晚有咩要留意?做好自己就確保你玩得開心又安心!

近排真喺好興Staycation,唔少情侶、朋友閨蜜、一家大細都去酒店放鬆吓chill吓!可能你都睇到網上有條片見到半島間房俾住客搞到房唔似房,真喺有啲嬲。去玩開心固然喺緊要,但都要顧及其他住客同酒店職員嘅感受,免得做咗「西客」。大家去Staycation都喺想放鬆,只要互相尊重企喺別人角度諗吓,其實已經可以免卻好多唔愉快嘅事件。都喺個句,己所不欲,勿施於人,做返個正常人就可以!

印象深刻嘅電視廣告成日講「今時今日咁嘅服務態度唔得架!」事實上呢句說話有少少單向,做俾錢果個固然要收到應有服務態度。里先生都同你講「今時今日做個西客係唔得架!」服務你果個都同樣應該被禮貌對待或者叫做服務緊一個正常人而唔係「西客」,想被人尊重,唔該你都做返個Nice客。有時有啲嘢做咗人哋唔出聲話唔代表啱,只係酒店費事同啲西客嘈想解決事情啫。今次就講少少香港Staycation Dos & Don’ts,其實都喺個人意見,唔喺絕對正確,旨在想俾大家了解吓Staycation熱潮下唔同人嘅角度諗法,無論你係客人還是酒店同仁,你有想法意見的話都歡迎補一補俾我,可以留言或者PM同我講~~

***歡迎轉載,轉載 www.mrmiles.hk/staycation-guide/ 同時都請你都俾返個Credit里先生 MrMiles.hk ***

👼🏻Staycation-Dos

1. 保持房間清潔,走時盡量維持原狀

呢個point相信大家都理解,唔喺話要你幫酒店員工執埋房,而喺盡量維持返間房嘅基本清潔,你住個陣舒服乾淨啲,清潔部員工又執得爽手,何樂而不為呢?

2. 耐心等侯,跟規矩排隊

近排咁興Staycation,其實各大酒店都真喺好爆好忙,如果到咗星期六日紅假更加係人山人海,先前我去到半島酒店都唔例外…所以唔同服務,例如check-in、check-out、執房等等時間耐咗都唔係無道理,就好似你旺季去旅行check-in登機都要排耐咗咁解啫。所以大家俾多啲耐性等侯排好隊,出嚟玩都喺想放鬆吓,唔洗咁燥嘅~

一分錢一分貨,可以提提大家真係完全唔想排嘅咪洗多啲錢訂Club Room或套房,一般高級啲既酒店都會有Club Lounge俾客人安坐等check-in,如果係最平房或者平package…又真係要low低少少expectation排下隊喇…

3. 盡量控制同行小童及公眾地方保持安靜及儀態

Staycation最啱一家大細去㗎啦!完全明白有時小朋友唔喺咁容易控制,喺酒店不論喺去食自助餐、游水,Club Lounge等公眾地方,都請大家盡量管教小朋友,唔好橫衝直撞或者大叫,確保你嘅小朋友安全之餘,仲可以尊重返其他嚟玩嘅朋友同酒店員工~

唔好話小朋友,有時太high可能成年人都唔覺意失禮咗。係公眾地方,特別係Club Lounge果啲靜靜地嘅地方就大人細路都好,都真係靜靜地保持返應有儀態免得失禮人。如果一時唔覺意high咗被酒店職員提醒的話都好收一收講返聲唔好意思喇~~

4. 記低好員工嘅名,填返相關問卷同評價

服務行業為顧客為先,所以都好重視客人嘅意見,唔少酒店喺入住之後都會send返email請大家填返問卷,我嘅習慣係遇到好員工嘅時候會記低佢地嘅名,再喺問卷寫返個事實讚吓人地,俾人哋做都做得開心啲吖!但記住呢啲問卷10分滿分嘅話,通常合格準則喺8分,你俾7分以下嘅話其實係好心做壞事…所以大家都唔好吝嗇自己嘅讚美,appreciation從來都冇人嫌多㗎!另外如果覺得住完酒店好滿意,都不妨去TripAdvisor俾返評價,呢樣嘢對有心做好嘢嘅員工同酒店嚟講都好重要㗎!

5. 帶備叉電線或一般未必由酒店提供之物品

出去住返一兩晚都應該要叉叉部電話,有酒店本身會配備叉電線,但呢個唔係必然架,既然staycation當旅行就執齊行李,唔好諗住酒店就乜都俾到你啊!都可以講埋應該唔少人都鐘意拎支酒去酒店嘆下,都提一提因為衛生問題,現時酒店房未必default會有bottle opener,如果要嘆下酒嘅話最好拎埋,免得又要問酒店拎啦~~

😎Staycation-Neutrals(可圈可點)

1. 生日/特別日子要求免費額外禮品/服務

其實個人覺得生日或者有特別日子慶祝禮貌地講聲俾酒店知喺合理,有唔少酒店訂房時仲特登加一欄Remarks俾你寫添。係唔爆嘅日子的確係好多星級酒店都會有升房俾忠誠會員或者有啲complimentary俾返客人(免費禮遇,行內應該叫comps),但同時你都要明白人地俾你喺人情,唔俾你喺道理,上唔到套房/高級房就嬲嬲其實某程上你已經成為咗個西客。如果員工真喺俾唔到你就算啦,唔好死R爛R,盞搞到大家都難做。而且唔好要求太過份死要拎嘢又威脅人要投訴,始終人哋做生意都唔係下下可以俾到免費嘢~

Source: Facebook-香港酒店工會 Hong Kong Hotel Employees Union

我有見過網友反映去酒店慶祝Anniversary但嚟咗個Cake係Happy Birthday,無錯,係笑話嚟而酒店方的確有啲肉酸。但我都想講講現時酒店要接多咗香港人客staycation,唔少人都特別日子先會去住下,要應付咁大「慶祝」需求都唔容易。如果係送嘅Cake呢啲少少問題我覺得就算數啦,本身已經係酒店俾嘅免費嘢,呢加全民Staycation唔做死整餅果個都做死派餅果個…唔放心嘅就自己帶Cake查清楚先包無甩拖。

2.拎amenity

相信大家去酒店住都會拎走一啲amenity,例如梳啊牙刷啊咁樣,有人想留嚟做記念,有人純粹覺得呢啲旅行裝好方便,之後都會用得著,拎amenity我都係覺得可以理解。但留意都要適可而止,唔好太貪心,拎完基本配備果份唔夠仲要叫call to ask,試想吓如果個個都咁做,酒店同員工其實都好難做㗎。

3.屈蛇

個人覺得訂間房招呼朋友都合理,尤其是book咗間suite有房又有廳,真喺啱哂朋友去gathering,但同時留意屈蛇都要顧及其他住客感受,留意返酒店嘅規定,去過有啲過咗11pm就要加收人頭費,咁我認為11pm-12pm前散嘅都合理,但過夜就唔好啦。將心比己,如果你隔離個間房成日有人出出入入,又嘈又性,你都玩得唔盡興啦,一層咁多房,一間房影響哂咁多住客都真喺唔要得㗎!如果真喺有人嚟提醒你地,就自動自覺散band,唔好再拗啲咩令大家都難做啦。

Source: Facebook-香港酒店工會 Hong Kong Hotel Employees Union

4. 俾Tips酒店職員

喺香港住酒店其實我從來無覺得酒店員工有R tips嘅感覺,但如果你覺得有職員好好嘅都不妨俾tips鼓勵吓。都知道而家電子錢包好方便,所以唔少人可能身上都無散紙,有心俾tips的話下次去staycation不妨都帶定少少散紙可以用嚟俾tips啊!

👿Staycation-Don’ts

1. 住完搞到房唔似房,亂到七彩

相信大家睇完半島間房俾住客整到房唔似房個條片之後,都會明白呢個point。見到間房搞到咁真喺有啲心up,大家開開心心去玩,但就要一大班員工幫你執手尾,尊重人都尊重返自己,做個文明人,唔好將自己嘅快樂建立喺別人嘅痛苦上。上面都講到,唔喺話要你幫酒店員工執埋房,而喺盡量維持返間房嘅基本清潔,其實一啲都唔難做到啊。

Source: Facebook-香港酒店工會 Hong Kong Hotel Employees Union

2. 整壞/整污漕唔通知又走數

其實有時都真喺唔喺特登整爛整污漕酒店房,但如果真喺有啲咩壞咗,大家都請通知返酒店負返責任。例如倒瀉咗汽水喺床度,其實只要通知返酒店職員俾返相關清潔費就可以解決到,但如果你扮唔知唔理,結果都喺要人地執你啲屎,跟手被香港酒店業blacklist就無謂啦。大家去得staycation放鬆吓,無謂為少少錢搞到大家唔開心,最簡單都喺自己承擔返自己做嘅嘢,咁就輕輕鬆鬆可以繼續嘆世界啦~

Source: Facebook-香港酒店工會 Hong Kong Hotel Employees Union

3. 喺房內食大味嘢或吸煙

雖則酒店房有通風系統,但如果食啲太大味嘅嘢,例如榴槤、臭豆腐咁,真喺通風系統幾勁都搞唔掂,要散味都要一段時間,我所知係馬來西亞住酒店食榴槤仲要係犯法會被拉架!雖然香港無犯法,但係都唔好啦。諗吓你入一到房咁大陣味,尤其是呢啲大味嘢真喺唔喺個個鐘意,要咁樣焗喺間房度都真喺幾痛苦㗎!

吸煙都留意返,香港大部份酒店都係無吸煙房,而部份酒店就會有吸煙樓層,你真係時時刻刻都要食煙的話就訂返啲吸煙酒店房啦,無謂搞到其他人!

4. 拎走酒店properties

先前睇戲講有啲失德客專登拎走啲浴袍,被,床具,杯同碗碗碟碟咁。得唔得?梗係唔得啦,呢啲「硬件」明顯係酒店嘅properties嚟,你拎走嘅話就預咗要被recharge付出代價,又或是被blacklist。仲有一樣,雨傘都係酒店properties嚟,借用完要還,真係鐘意的話你可以問下酒店有無得買走嘅!

以上都有提及拎amenities,你話果啲一次性用品我覺得就可以嘅,有啲洗頭水又或是你用過嘅梳咁,你攞走埋重覆用仲環保添。作為酒店愛好者,我都有個難習慣係儲下酒店筆,我一般都會check-out時問下可唔可以拎,暫時100%都仲係可以嘅,但拎還拎都唔好貪心,拎一支留個紀念好喇~~

***歡迎轉載,轉載 www.mrmiles.hk/staycation-guide/ 同時都請你都俾返個Credit里先生 MrMiles.hk ***

Staycation推介

如果想睇埋其他酒店Staycation優惠比較下,可以睇返香港酒店優惠Staycation合集米芝蓮餐廳優惠Staycation/Eatcation指南!或者有狗狗既朋友可以睇下Pet Friendly酒店優惠Dogcation!如果係Staycation新手唔知規矩,記得睇睇香港Staycation Dos & Don'ts(2020年10月30日更新) 今期最抵Staycation優惠:朗廷酒店The Langham $0房優惠康得思Cordis $0房價優惠君悅酒店Grand Hyatt食+住優惠 想知用咩信用卡係酒店俾錢最抵就睇返Staycation酒店信用卡比較啦!

你可能有興趣的文章...

Leave a Reply